މަހެއްހާ ދުވަހުގެ ތެރޭގައި ރާއްޖޭގެ ހުރިހާ ކައުންސިލްތަކާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކާ ބައްދަލުކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މި ހަފުތާގައި އެ މަނިކުފާނު ތ. އަތޮޅަށް 10 ރަށަކަށް ވަޑައިގެން އެ ރަށްރަށުގެ ކައުންސިލްތަކާއި އަންހެނުންގެ ކޮމިޓީތަކާ ވެސް ބައްދަލުކުރައްވާފައިވާ އިރު، ރައީސް ވިދާޅުވީ ބޭނުންވެވަޑައިގަންނަވަނީ ލަފުޒީ މާނައިގައި ސީދާ ރައްޔިތުންނާ ގާތަށް ރައްޔިތުންނާ ބައްދަލު ކުރުން ކަމަށެވެ.
އެހެންވެ މިހާރު އަމާޒަކަށްވެފައި އޮތީ އެއް މަސް ތެރޭގައި ހުރިހާ ކައުންސިލްތަކާއި އަންހެނުންގެ ކޮމިޓީތަކާ ބައްދަލު ކުރެއްވުން ކަމަށް ވިދާޅުވި އެވެ.
"އަޅުގަނޑު ހުންނަ ތަނަށް އޮފީހަށް ކައުންސިލް ގެނެސްގެން ކައުންސިލާ ބައްދަލުކުރާކަށް ނޫން ބޭނުން ވަނީ. ކައުންސިލް އޮތް ތަނަށް [ބައްދަލުކުރަން ދާން] އަޅުގަނޑު ބޭނުންވަނީ،" ކިނބިދޫގައި އިއްޔެ ރައީސް ވިދާޅުވި އެވެ. "މަސް ދުވަސް މި ކަނޑައަޅަނީ. ގާތްގަނޑަކަށް އެއް މަސް ތެރޭގައި އަޅުގަނޑުމެން ހުރިހާ ކައުންސިލްތަކާ ބައްދަލުކުރަން ރަށްރަށަށް ދާނަން."
ރައީސް ވިދާޅުވީ މި އަމާޒަށް ވާސިލުވުމަށްޓަކައި އެއް މަސްތެރޭގައި ރާއްޖޭގެ ހުރިހާ ރަށަށް ވަޑައިނުގެންނެވޭނެ ކަމަށެވެ. އެހެންވެ އީސް ވިދާޅުވި ގޮތުގައި ހުރިހާ ކައުންސިލްތަކާ ބައްދަލުކުރެއްވިއަސް އެއް މަސް ތެރޭގައި ރާއްޖޭގެ ހުރިހާ ރަށަކަށް އެމަނިކުފާނު ވަޑައިގަންނަވާ ރަށަކަށް ،އެ ރަށާ ކައިރީގައިވާ ރަށްރަށުގެ ކައުންސިލަރުން ގެންގޮސް ބައްދަލުކުރައްވާނެ ކަމަށް ވިދާޅުވި އެވެ.
ރައީސް ތ. އަތޮޅަށް ތިން ދުވަހަށް ކުރެއްވި ދަތުރަކީ ރައީސްކަމުގެ ހުވާކުރެއްވި ފަހުން އަތޮޅުތެރެއަށް ކުރެއްވި ފުރަތަމަ ރަސްމީ ދަތުރެވެ.