ރަސްމީ ދަތުރެއްގައި ރައީސް ޑރ. މުޙައްމަދު މުޢިއްޒު މާދަމަ ޔޫއޭއީ އަށް ފުރާ ވަޑައިގަންނަވަން ހަމަޖެހިއްޖެ އެވެ.
މި ދަތުރަކީ ވޯލްޑް ގަވަރމަންޓްސް ސަމިޓުގައި ބައިވެރިވެ ވަޑައިގަތުމަށް ކުރައްވާ ދަތުރެކެވެ. އެ ސަމިޓް ކުރިއަށް ދާނީ މި މަހުގެ 12-14 އަށް ދުބާއީގަ އެވެ.
ރައީސާ އެކީ މި ދަތުރުގައި ސަރުކާރުގެ މަތީފަންތީގެ ވަފުދެއް ވެސް ބައިވެރިވެވަޑައިގަންނަވާނެ އެވެ. ދަތުރު ނިންމަވާލެއްވުމަށް ފަހު ރައީސް އެނބުރި މާލެ ވަޑައިގަންނަވާނީ މި މަހުގެ 15 ގަ އެވެ.
މިދިޔަ ޑިސެމްބަރު މަހު ކޮޕް-28 ގައި ބައިވެރިވަޑައިގަތުމަށް ވެސް ރައީސް ޔޫއޭއީ އަށް ވަޑައިގެންނެވި އެވެ. އެ މަނިފާނު އެންމެ ފަހުން ރަސްމީ ދަތުރެއްގައި ވަޑައިގެންނެވީ މިދިޔަ މަހުގެ ކުރީކޮޅު ޗައިނާއަށެވެ.