އައްޑޫސީޓީ ކައުންސިލް އިދާރާގެ މުވައްޒަފުންނާއި ގުޅޭގޮތުން ސާބިތު ނުހިފޭ ވާހަކަ ދައްކާ ފަރާތްތަކާއި މެދު ފިޔަވަޅު އެޅުމަށް އޮންނަ އުސޫލުން ކުރަން ޖެހޭ ކަންކަން ކުރާނެ ކަމަށް އައްޑޫސިޓީ ކައުންސިލުން ބުނެފިއެވެ.
ކައުންސިލުން ނެރުނު ނޫސްބަޔާނެއްގައި ބުނީ، އެ އިދާރާގެ މުވައްޒަފަކަށް އަމާޒުކޮށް މީސްމީޑިއާގައި އާންމު ފަރާތަކުން ތުހުމަތުތަކެއްކޮށް ފަތުރަމުންދާ ކަމަށެވެ. އެގޮތުން އެ މުވައްޒަފުގެ އަމިއްލަ މީސްމީޑިއާގައި ހިއްސާ ކޮށްފައިވާ ފޮޓޯ ބޭނުންކޮށް، އެ މުވައްޒަފު ބަދުނާމު ކުރުމުގެ ނިޔަތުގައި އެ މުވައްޒަފާއި ގުޅޭގޮތުން ސާބިތު ނުހިފޭ ވާހަކަ ދައްކަމުން ދާ ކަމަށެވެ. އަދި އެފަދަ ޕޯސްޓުތައް ޝެއަރ ކުރުން އެ އިދާރާއިން ވަނީ ހަރުކަށި އިބާރާތުން ކުށްވެރިކޮށްފައެވެ.
ކައުންސިލުން ބުނެފައިވަނީ އެއިދާރާގެ އެއްވެސް މުވައްޒަފަކާއި މެދު، ޤަވާއިދާއި ޚިލާފަށް ކަމެއް ކުރާކަމަށް ޝައްކު ކުރެވޭނަމަ އެއިދާރާއަށް ނުވަތަ ކަމާއި ގުޅުންހުރި އެހެން އިދާރާތަކަށް ރަސްމީ ސިފައެއްގައި މައްސަލަ ހުށަހެޅުމުގެ ފުރުސަތު އޮންނާނެ ކަމަށެވެ. އަދި ދައުލަތުގެ މާލިއްޔަތު ޤާނޫނާއި ޤަވައިދާއި ޚިލާފަށް ވަކި ބަޔަކަށް ނުހައްޤުން މަންފާއެއް ހޯދަން މަސައްކަތް ކުރާނަމަ ވަކި މިނިސްޓްރީއަކަށް ހުށަހެޅުމުގެ ފުރުސަތު އޮތްކަމަށެވެ.
އައްޑޫސިޓީ ކައުންސިލުގެ ބަޔާނުގައި ބުނީ މިފަދަ ނާތަހުޒީބު ގޮތަކަށް މުވައްޒަފުގެ އަބުރު ކަތިލައި މުވައްޒަފުންނަށް ބިރު ދެއްކުމުގެ ގޮތުން މީސްމީޑިއާގައި ޕޯސްޓުތައް ލިޔެހެދި ފަރާތްތަކަށް އޮންނަ އުސޫލުގެ ތެރެއިން ފިޔަވަޅު އެޅުމަށް ކުރަން ޖެހޭ އެންމެހައި ކަންކަން ކުރާނެ ކަމަށެވެ.
މީގެ އިތުރުން މިފަދަ ކަމެއް ޝައްކުވާނަމަ އެއިދާރާއަށް ހުށަހަޅައި ނުވަތަ ކަމާއި ގުޅުން ހުރި އިދާރާތަކަށް ހުށަހަޅައިގެން ކުރިއަށް ގެންދިއުމަށް ވަނީ އިލްތިމާސްކޮށްފައެވެ. އަދި މުވައްޒަފުންގެ ފޮޓޯ ބޭނުންކޮށްގެން ސާބިތު ނުހިފޭ ވާހަކަ ނުފެތުރުމަށް ވަނީ އިލްތިމާސްކޮށްފައެވެ.
މީސް މީޑިއާގައި އާންމު ފަރާތަކުން ވަނީ އައްޑޫގައި މިހާރު ކުރިއަށްދާ އެތްލެޓިކްސް މުބާރާތުގައި ކައުންސިލުގެ މުވައްޒަފަކު ވަކި ފަރާތަކަށް މަންފާ ހޯދައި ދިނުމަށް މަސައްކަތް ކޮށްފައިވާ ކަމަށް ތުހުމަތު ކޮށްފައެވެ.