ގެދޮރުވެރިޔާ ސްކީމުގެ ދަށުން މާލެ ސަރަހައްދުން ދޫކުރާ ފްލެޓްތަކުގެ ލިސްޓުގައި ހިމެނޭ ހައްޤުވެރިންނަށް ފްލެޓު ދޫކުރާނީ އޭސީސީ އަދި އެޓާނީ ޖެނެރަލްގެ ލަފާގެ މަތިން ކަމަށް ހައުސިން މިނިސްޓްރީން ހާމަކޮށްފިއެވެ.
ހައުސިން މިނިސްޓްރީން މިރޭ ބުނި ގޮތުގައި އެ ލިސްޓުގައި ހިމެނޭ ހައްޤުވެރިންނަށް ފްލެޓު ދިނުމުގެ އިންތިޒާމުތައް ހަމަޖައްސަމުންދާ ކަމަށެވެ. މިރޭ އިރާކޮޅު ހައުސިންގް މިނިސްޓްރީން ނެރުނު ބަޔާނެއްގައި ބުނީ، ފްލެޓުތަކާއި ގުޅޭގޮތުން އޭސީސީން ތަހުޤީޤުކޮށް ބެލިބެލުމުން ޝަރުތު ހަމަވާ އަދި އިތުރު މައްސަލައެއް ހުރިިކަން ފާހަގަ ނުވާ މީހުންގެ ލިސްޓެއް މިނިސްޓްރީއަށް ފޮނުވާފައިވާ ކަމަށެވެ.
މިނިސްޓްރީއަށް އެ ލިސްޓު ލިބިފައިވަނީ މިހަފްތާގެ ބުރާސްފަތި ދުވަހު ކަމަށް މިނިސްޓްރީން ވަނީ ބުނެފައެވެ. އަދި އެ ފޯމު ލިސްޓަކީ ތަހުޤީޤު ބޭނުމަށް އެއްކޮށްފައިވާ މައުލޫމާތަށް ބިނާކޮށް ތައްޔާރުކޮށްފައިވާ ލިސްޓެއް ކަމުން، ގެދޮރުވެރިޔާ ސްކީމުގެ ދަށުން ފްލެޓު ލިބޭ ފަރާތްތައް ކަނޑައެޅުމުގެ އިންތިޒާމު ހަމަޖައްސަމުންދާ ކަމަށް މިނިސްޓްރީން ވަނީ ބުނެއެވެ.
ގެދޮރުވެރިޔާ ސްކީމުގެ ދަށުން 13،000 އަށް ވުރެ ގިނަ ފޯމު ޝަރުތު ހަމަވާކަމަށް މިދިޔަ ސަރުކާރުން ވަނީ ކަނޑައަޅައި އެ އެންމެންނަށް ފްލެޓު ލިބޭނެ ކަމަށް ވަނީ ބުނެފައެވެ. އޭގެ ތެރެއިން ފުރަތަމަ 4000 މީހުންނަށް ފްލެޓުތައް ގުރުނަގައި ވަނީ އެއްބަސްވުމުގައި ބައެއް ފަރާތްތަކާއި އެކު ސޮއިވެސް ކޮށްފައެވެ.