މިއަދު ޝަހީދުންގެ ދުވަސް ފާހަގަ ކުރަމުން އަންނަ މި ދުވަސް ހާއްސަވާ އަލިރަސްގެފާނުގެ ޖިހާދުން މިއަދުގެ ސިޔާސީ ލީޑަރުންނަށް ގޮވައިލަނީ ބޭރުގެ ބާރުތަކުގެ ފައިބުޑަށް ތިރިނުވާން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އެ މަނިކުފާނު މިއަދު ދެއްވި ހިތޯބުގައި ވިދާޅުވީ އަލިރަސްގެފާނުންގެ ޖިހާދަކީ މިއަދުގެ ސިޔާސީ މީހުން ފިލާވަޅާއި އިބުރަހް ހާސިލުކުރަން ޖެހޭ ކަމެއް ކަމަށެވެ. އަދުގެ
"ބޭރުގެ ދަހިވެތި ބާރުތަކުގެ ފައިބުޑަށް ތިރިނުވާން އެބަ ގޮވާލައި. ދިވެހީންގެ ސަލާމަތް ދިވެހީން ހޯދަން އެބަ ގޮވާލާ." ރައީސް ވިދާޅުވިއެވެ.
އެ މަނިކުފާނު ވިދާޅުވީ، އެ ޖިހާދަކީ ގައުމުގެ ޒުވާނުންނާއި މީޑިއާތަކަށް ގޮވައިލާ މުހިއްމު ގޮވައިލުންތަކެއް ކަމަށާއިޚަބަރު ފަތުރާއިރު ގައުމާ އެއްކޮޅަށް ޚަބަރު ފަތުރަން އެ ޖިހާދުން ނަސޭހަތްދޭ ކަމަށެވެ. އަދި، ދޮގު ޚަބަރު ނުފަތުރަން އިންޒާރުދޭ ކަމަށް ވެސް ވިދާޅުވިއެވެ.
"ޒުވާންކަމުގެ އޮއެވަރުގައި އަމިއްލަ ދީނާއި އަމިއްލަ ގައުމު ފަހަނައަޅައި ނުދާން އެބަ ނަސޭހަތްތެރިވޭ،" ރައީސް ވިދާޅުވި އެވެ. "ހަގީގަތުގައި އަލިރަސްގެފާނުގެ ޖިހާދު އަދުގެ ދިވެހީންނަށް ދޭ އެންމެ ބޮޑު ފިލާވަޅަކީ މާތްﷲ ހައްގަށް ނަސްރުދެއްވާނެކަން. އެއީ، ބިމުގެ ކުޑަކަމަކާއި އާބާދީގެ މަދުކަމަކާ ގުޅިފައި އޮންނަ ކަމެއް ނޫންކަން."
ރައީސް ފާހަގަކުރެއްވި ގޮތުގައި ޕޯޗުގީޒުންގެ އަޅުވެތިކަމުން ކާބަފައިން މި ގައުމު ސަލާމަތްކޮށް ދޫފައި ވަނީ ގައުމަށް ވަދފާތެރި ގުރުބާނީތަކާ އެކީގަ އެވެ. އަދި، ބޭރުގެ ބާރަކަށް ނަފާ ލިބޭ ގޮތަށް ކަޅު މުހައްމަދު ރަސްގެފާނު ދޫކުރެއްވި ރަށްރަށް ވެސް އަލުން ދިވެހީންނަށް ހޯދައި ދެއްވާފައިވާކަން ފާހަގަކުރެއްވި އެވެ.
އެހެންވެ އެ ޖިހާދުން އިބުރަތް ލިބިގެން ދިވެހި ކަނޑުން ގެއްލުނު ބައި ވެސް މި ސަރުކާރުން ހޯދައިދެއްވާނެ ކަމަށް ވިދާޅުވި އެވެ.
"ދިވެހި ބިމަކީ ބޭރުގެ އަސްކަރީ ބާރުތަކަށް ޖާގަ ނެތް ބިމެއްކަމުގައި ހަދާނަން." ރައީސް ވިދާޅުވި އެވެ.
އެ މަނިކުފާނު ވިދާޅުވީ، އަމިއްލަ ބިމުގެ ބާރުވެރިކަން އަތުގައި ނެތް ގައުމުތައް އުޅޭ ހާލު އަބަދާއި އަބަދު ފެންނަ ކަމަށާއި އޭގެ މިސާލަކީ ފަލަސްތީނު ކަމަށެވެ. އަދި ދިވެހި އެފަދަ ދުވަހެއް ދެކެން ނޭދޭ ކަމަށް ރައީސް ވިދާޅުވި އެވެ.
"އަޅުގަނޑުގެ އިޚުލާސްތެރި އިލްތިމާސަކީ މި ގައުމަށް ތެދުވެރިވާށޭ. ދީނަށް ހުރުމަތްތެރިކޮށް ހިތާށޭ. ދައުލަތަށް ވަފާތެރިވާށޭ." ރައީސް ވިދާޅުވި އެވެ.
އެ މަނިކުފާނު ވިދާޅުވީ، ހަސަން ރަސްގެފާނާއި ޕޯޗުގީޒުންނާ ދެމެދު އޮތް ގުޅުން ފެށިފައި ވަނީ ކަޅު މުހައްމަދު ރަސްގެފާނާ ހަމައިން ކަމަށާއި ޝަހީދުންގެ ދުވަހަށް އަލިވިލޭއިރު އޭގެ އަނެއް ފަރާތުގައި ވަނީ ބޮޑެތި ޚިޔާނާތްތަކެއް ކަމަށެވެ. އަދި
އެއީ،އަމިއްލަ އެދުމާއި ވެރިކަމުގެ ދަހިވެތިކަމުގައި ގައުމު ހަލާކުގެ ތެރެއަށް އެއްލައިލުން ކަމަށް ވިދާޅުވި އެވެ.
"އެއް ފަރާތުން މި ފެންނަނީ އަމިއްލަ އެދުން. ދިވެހީން ދިވެހި ގައުމަށް ޚިޔާނާތްތެރިވުން. ހަމައެއާ އެކު މި ފެންނަނީ ބޭރުގެ ބާރުތަކުން މަސައްކަތްކުރާ ގޮތް،" ރައީސް ވިދާޅުވި އެވެ. "އެ މީހުންގެ ހީލަތްތެރި ރޭވުން. ދިވެއްސެއްގެ އެދުމަށް އެ މީހުން ދިވެހިރާއްޖެ އަޅުވެތިކުރުން."