މިފްކޯ އަށް މަސް ގަންނަ އަގު ދަށްކުރަން ނިންމައިފި އެވެ.
އެނގިފައިވާ ގޮތުގައި މިކަމާ ގުޅޭ ގޮތުން އިކޮނޮމިކް ކައުންސިލްގައި މަޝްވަރާކޮށް ނިންމާފައި ވަނީ މަސް ގަންނަ މިހާރުގެ އަގު 25ރ. އިން 20ރ. އަށް ދަށްކުރުމަށެވެ. ނަމަވެސް މިކަން އަދި ސަރުކާރުން އިއުލާނެއް ނުކުރެ އެވެ.
މަސްވެރިންގެ އަތުން މަސް ކިލޯއެއް ގަންނަ އަގު 25ރ. އަށް ހެދީ މިދިޔަ އަހަރުގެ ރިޔާސީ އިންތިހާބުގެ ދެވަނަ ބުރުގެ ތެރޭގަ އެވެ.
މަސް ގަންނަ އަގު ދަށްކުރަން މި ސަރުކާރުން ނިންމާފައިވާ އިރު، މަހަށް ލިބޭ އަގު ކުޑަވުމަކީ މަސްވެރިންގެ އެންމެ ބޮޑެތި ޝަކުވާތަކުގެ ތެރޭގައި ހިމެނޭ ކަމެކެވެ. އަދި ކިރާ މަހަށް ފައިސާ ލިބުން ލަސްވާ މައްސަލަ އަކީ މަސްވެރިންގެ އެންމެ ބޮޑު ޝަކުވާ އެވެ.
މިކަމާ ގުޅިގެން ރައީސް މީގެ ދުވަސްކޮޅެއް ކުރިން ވިދާޅުވެފައި ވަނީ ލޯނެއް ނަގައިގެން ކަމަށް ވިޔަސް މަސްވެރިންނަށް ދޭން ޖެހިފައި ހުރި ފައިސާ ދީ ނިންމަން ސަރުކާރުން މަސައްކަތް ކުރަމުން އަންނަ ކަމަށެވެ.