ފުލުހުންނަށް ނުކިޔަމަންތެރިކަން ދެއްކި މީހަކު ހައްޔަރުކޮށް، އޭނަގެ މައްސަލަ ބަލަމުން އަންނަ ކަމަށް ފުލުހުން ބުނެފި އެވެ.
މަގުމަތީގައި އާންމުންގެ ބަޔަކު ތިން ފުލުހަކު "ސައިޒްކޮށްފި" ކަމަށް ބުނެ ސޯޝަލް މީޑިއާގައި ރޭ ދައުރުވި ވީޑިއޯއާ ގުޅިގެން ފުލުހުން އާންމުކުރި ކުރު ބަޔާނެއްގައި ބުނީ އެ ވީޑިއޯ އިން ފެންނަނީ ނުރައްކާތެރިކޮށް އަދި އާންމުންގެ ހިތުގައި ބިރުވެރިކަން އުފެދޭ ގޮތަށް ދުއްވި މީހަކު ހުއްޓުވުމުން ހިނގައި ދިޔަ ކަންތައްތަކެއް ކަމަށެވެ.
"އެއީ ފުލުހުންގެ އަމުރަށް ނުކިޔަމަންތެރިވުމާ ގުޅިގެން އެމީހާ ހައްޔަރު ކުރުމުގެ ވަގުތުކޮޅެއް ކުރި. އެމީހާ ހައްޔަރުކޮށް މި މައްސަލަ ފުލުހުން ގެންދަނީ ތަހުގީގު ކުރަމުން." ފުލުހުން ބުންޏެވެ.
ފުލުހުން ބުނީ އެ ވީޑިއޯ އާންމުކޮށްފައި ވަނީ ފުލުހުންގެ ބާރު ނެތް ކަމަށް ދޭހަވާ ގޮތަށް އަދި ކަން ހިނގާފައިވާ ގޮތް ރައްޔިތުންނަށް އޮޅޭ ގޮތަށް ކަމަށެވެ.