މާލެ ސަރަހައްދުގައި ހަދަން ނިންމާފައިވާ ކެންސަރު ހޮސްޕިޓަލްގެ ކޮންސަލްޓޭޝަނާއި ފީޒިބިލިޓީ މަސައްކަތްކޮށް ދޭނެ ބަޔަކު ހޯދަން ބީލަމަށް ހުޅުވާލައިފި އެވެ.
ހެލްތު މިނިސްޓްރީން ވަނީ މިކަމަށް ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު މި މަހުގެ 29 އާ ހަމައަށް ހުޅުވާލައިފަ އެވެ. އެގޮތުން ޕްރޮޕޯސަލް ހުށަހަޅަން ޖެހެނީ އެ ދުވަހުގެ ހެނދުނު 10:00 ގަ އެވެ. މީ ބީލަމުގައި ބައިވެރިވާން މި މަހުގެ 25 ގެ މެންދުރު ފަހު 1:00 ކުރިން ރަޖިސްޓްރީވާން ޖެހެ އެވެ.
މިނިސްޓްރީން ބުނީ ރަޖިސްޓްރީނުކުރާ ފަރާތްތަކާއި ޕްރޮޕޯސަލް ހުށަހަޅަން ދިން ގަޑިއަށް ހާޒިރުނުވާ ފަރާތްތަކުގެ ޕްރޮޕޯސަލް ބަލައިނުގަންނާނެ ކަމަށެވެ.
މާލެ ސަރަހައްދުގައި ހަދަން ނިންމި ކެންސަރު ހޮސްޕިޓަލަކީ ކުރިން ލ. ގަމުގައި ހަދަން ނިންމާފައިވާ ހޮސްޕިޓަލެކެވެ. ނަމަވެސް އެތަން މާލެ ސަރަހައްދުގައި ހަދަން މި ސަރުކާރުން ނިންމީ މާލެ ސަރަހައްދުގައި ހަދަން ނިންމާފައި އޮތް މެންޓަލް ހޮސްޕިޓަލް ލ. އަތޮޅުގައި ހަދާ ގޮތަށް ބަދަލު ކުރުމަށް ފަހު އެވެ.
ހެލްތު މިނިސްޓަރު ޑރ. އަބްދުﷲ ހަލީލު ވިދާޅުވެފައި ވަނީ ކެންސަރު ހޮސްޕިޓަލް މާލެ ސަރަހައްދަށް ބަދަލުކޮށް، މެންޓަލް ހެލްތު ސެންޓަރު އަޅާނީ، ރައީސް ޑރ. މުހައްމަދު މުއިއްޒުގެ ރިޔާސީ ވައުދާ އެއްގޮތަށް ލ. ގަމުގައި ކަމަށެވެ. އަދި
ސަރުކާރުގެ އެ ނިންމުމާއެކު، ކެންސަރު ހޮސްޕިޓަލް އަޅަން ނިންމާފައި ވަނީ ދުބާއީގެ ފަންޑެއްގެ ތެރެއިން ކަމަށް ވިދާޅުވެފައިވެ އެވެ.
އެހެންވެ ކެންސަރު ހޮސްޕިޓަލް މަޝްރޫއަށް އިންޑިއާ ސަރުކާރު ދިން ލޯނު، އެހެން ގޮތަކަށް ބޭނުންކުރުމުގެ މަޝްވަރާތައް އެ ގައުމާއެކު ކުރަމުން އަންނަ ކަމަށް މިނިސްޓަރު ވިދާޅުވެފައިވެ އެވެ.