މޯލްޑިވްސް އިސްލާމިކް ބޭންކް (އެމްއައިބީ) ގެ ކާޑުތަކުން ބޭރުގެ މުއާމަލާތް ކުރެވޭ ލިމިޓް ބޮޑުކޮށްފި އެވެ.
އެ ބޭންކުން ބުނީ ކަސްޓަމަރުންގެ ތެރެއިން މުސާރަ އެމްއައިބީ އަށް ޖަމާކުރާ ކަސްޓަމަރުންނަށް ރުފިޔާ އެކައުންޓަށް ދޫކުރާ ކާޑުން ރާއްޖޭން ބޭރުގެ މުއާމަލާތް ކުރެވޭ ލިމިޓު އިތުރުކޮށްފައިވާ ކަމަށެވެ. އެގޮތުން މުސާރަ ޖަމާކުރާ ކަސްޓަމަރުންގެ ރުފިޔާ ކާޑަށް ބޭރުގެ މުއާމަލާތް ކުރުމަށް ކުރިން ދެމުން އައި މަހަކު 100 ޑޮލަރުގެ ލިމިޓް މިހާރު ވަނީ 250 ޑޮލަރަށް ބޮޑުކޮށްފަ އެވެ.
އެމްއައިބީއަށް މުސާރަ ޖަމާކުރާ ކަސްޓަމަރުންނަކީ އެތަނުގެ "މިބްނައިން" (MB9) ކުލަބުގެ މެމްބަރުންނެވެ.
އެމްއައިބީން ބުނި ގޮތުގައި އެ މެމްބަރުންނަށް ލިބޭ އިތުރު ފައިދާތަކުގެ ތެރޭގައި "އުޖާލާ ދިރިއުޅުން" ފައިނޭންސް ސްމީކް މެދުވެރިކޮށް ފައިނޭންސްކުރާ ނަމަ ޕްރޮފިޓް ރޭޓު 15-13 ޕަސަންޓަށް ކުޑަވުމާއި ފައިނޭންސިން ޕްރޮސެސިން ފީ 1 ޕަސަންޓުން 0.5 ޕަސަންޓަށް ކުޑަވުން ހިމެނޭ ކަމަށެވެ. އަދި މެމްބަރަކަށް ވުމަށްފަހު ނަގާ ވިސާ އެވްރީޑޭ ކާޑުގެ ރެޖިސްޓްރޭޝަން ފީ އުނިވާނެ އެވެ.
އެމްއައިބީން ބުނީ އެ ބޭންކަށް މުސާރަ ޖަމާކުރަން ފަށާ ފުރަތަމަ މަހުން ފެށިގެން އެފައިދާތައް ކަސްޓަމަރުންނަށް ލިބެން ފަށާނެ ކަމަށާއި ބޮޑުކުރި ޑޮލަރު ލިމިޓާ އެކު ބޭންކަށް މުސާރަ ޖަމާކުރާ ކަސްޓަމަރުންގެ މެމްބާޝިޕް ބެނެފިޓްތައް އިތުރަށް ފުރިހަމަވާނެ ކަމަށެވެ.