ރައްޔިތުންގެ މަޖިލީހުގެ ންތިހާބަށް ކުރިމަތިލާން ހުޅުވާލި ސުންގަޑި މިއަދު ހަމަވިއިރު 381 ފޯމް ހުށައަޅާފައިވާ ކަމަށް އިލްކެޝަން ކޮމިޝަން (އީސީ) ބުނެފި އެވެ.
ސުންގަޑި ހަމަވީ މެންދުރު ފަހު 2:00 އަށެވެ. އިންތިހާބަށް އީސީން ހުޅުވީ މިދިޔަ މަހުގެ 30 ގަ އެވެ.
އެ ކޮމިޝަންގެ ރައީސް ފުއާދު ތައުފީގު ވިދާޅުވީ ސުންގަޑި ހަމަވި އިރު ހުށަހެޅި 381 ފޯމްގެ ތެރެއިން ބައެއް ފޯމް ފަހަރުގައި ރިޖެޓްވުމަކީ އެކަށީގެންވާ ކަމެއް ކަމަށެވެ.
"ބައެއް ފޯމްތައް ރިޖެކްޓު ކުރަން ޖެހިދާނެ ސަބަބަކީ އެ ފޯމްތަކާ އެކު ކުށުގެ ރިކޯޑް އަދި އެހެނިހެން ހުށަހަޅަން ޖެހޭ ލިޔުންތައް ހިމެނިފައި ނުވާތީ." އޭނަ ވިދާޅުވި އެވެ. "ކުށުގެ ރިކޯޑާޢި އެހެންނިހެން ލިޔެކިޔުންތައް ހަމަ ނޫން ނަމަ އެފޯމެއް ބަލައި ނުގަންނާނެ."
މަޖިލިސް އިންތިހާބަށް ޕާޓީތަކުގެ ފަރާތުންނާއި އަމިއްލަ ގޮތުން ވެސް ކެންޑިޑޭޓުން ވާދަކުރަން ހުށަހަޅާފައިވެ އެވެ.
ޕާޓީތަކަށް ބަލާއިރު ވެރިކަން ކުރާ ޕީއެންސީ/ޕީޕީއެމުން 90 ކެންޑިޑޭޓަކު ވާދަުރާ އިރު، އެމްޑީޕީން 89 ނެރެ އެވެ. ޑިމޮކްރެޓްސް އިން 41 ކެންޑިޑޭޓުން ވާދަކުރާ އިރު، ޖުމްހޫރީ ޕާޓީން 10 ކެންޑިޑޭޓުން، އަދާލަތު ޕާޓީން ހަތަރު ކެންޑިޑޭޓުން އަދި ކުރީގެ ރައީސް އަބްދުﷲ ޔާމީން އުފައްދަވަން މަސައްކަތްކުރައްވާ ޕީއެންއެފަށް ނިސްބަތްވާ 49 ކެންޑިޑޭޓުން ހިމެނެ އެވެ.
މަޖިލީހުގެ 20 ވަނަ ދައުރަށް މިހާރު ހިނގަމުން އަންނަ 19 ވަނަ މަޖިލީހުގެ ބައެއް މެންބަރުން ވެސް ވާދަކުރައްވަ އެވެ.
މަޖިލިސް އިންތިހާބު ބާއްވަން އީސީން ނިންމި ތާރީހަކީ އަންނަ މަހުގެ 17 އެވެ. ނަމަވެސް ރޯދަ މަސްނިމޭތާ 10 ދުވަސް ފަހުން އިންތިހާބު ބާއްވަން ރައްޔިތުން މަޖލީހުން މިހާރު އޮތީ ފާސްކޮށްފަ އެވެ.
ވިހި ވަނަ މަޖިލީހަށް 93 މެންބަރުން އިންތިހާބު ކުރާނެ އެވެ. މިހާރުގެ މަޖިލީހުގައި ތިއްވަނީ 87 މެންބަރުންނެވެ.