ދިވެހި ފަންނާނުންނަށް ހާއްސަކޮށްގެން އަންނަ ހުކުރު ދުވަހު މާލޭގައި "ފަންނީ އުފާ" ގެ ނަމުގައި އިވެންޓެއް ބާއްވަން ނިންމައިފި އެވެ.
ޔޫތު މިނިސްޓްރީން އިންތިޒާމުކުރާ މި އިވެންޓް އޮންނާނީ ސޯޝަލް ސެންޓަރުގަ އެވެ. މިއުޒިކީ ގިނަ ފަންނާނުންތަކެއް ވެސް ފެންނާނެ "ފަންނީ އުފާ" ކުރިއަށް ހުކުރު ދުވަހު ބާއްވާނީ ދެ ދަންފަޅިއަކަށެވެ. އެއީ ހަވީރު 4:00-6:00 އަށް ރޭގަނޑު 8:30-11:00 އަށެވެ.
ޔޫތު މިނިސްޓްރީން ބުނި ގޮތުގައި މި އިވެންޓްގެ މަގުސަދަކީ ދިވެހި ފަންނާނުންނަށް އެ މީހުންގެ ހުނަރު ދައްކާލައި، އޯޑިއަންސާ އޮންނަ ގުޅުން ބަދަހިކޮށް ދިނުމެވެ. އަދި މިއީ ފަންނާނުންނަށް އެ މީހުންގެ ހުނަރު ދައްކައިލަން ފަހިކޮށްދެވޭ އާ ޕްލެޓްފޯމެއް ކަމަށް ވެސް މިނިސްޓްރީން ބުންޏެވެ.
ޔޫތު މިނިސްޓްރީން ބުނީ އަމާޒަކީ "ފަންނީ އުފާ" ކޮންމެ މަހަކު އެއްފަހަރު ބޭއްވުން ކަމަށެވެ. މި އިވެންޓް މާލޭގެ އިތުރުން އަތޮޅުތެރޭގައި ވެސް ބާއްވާނެ ކަމަށް މިނިސްޓްރީން ބުންޏެވެ.