އެމްޑީޕީ އަށް އަބަދު ވެސް ވަފާތެރިވާނެ ކަމަށާއި ދެމިހުންނަވާނީ އެ ޕާޓީއާ އެކީ ކަމަށް އެމްޑީޕީގެ ޓިކެޓްގައި މާލޭގެ މޭޔަރު މިދިޔަ މަހު ވަޑައިގަތް އާދަމް އާޒިމް ވިދާޅުވެއްޖެ އެވެ.
ސަރުކާރުގެ ބައެއް ކުންފުނިތަކުގެ އިސް މަގާމުތަކެއް ކުރިން ފުރުއްވި އާޒިމް މިއަދު ރާއްޖެ ޓީވީގެ "ފަށާއިރު" ޕްރޮގްރާމްގައި ވިދާޅުވީ އޭނަ އެމްޑީޕީ އަށް ވަފާތެރިވާނެކަމާ މެދު ސުވާލު އުފެއްދޭނެ އެއްވެސް ސަބަބެއް ވެސް ނެތް ކަމަށެވެ. އަދި މޭޔަރު ކަމަށް ވަޑައިގެންނެވީ އެ ޕާޓީގެ ސިޔާސަތުތަކާ އެކީގައި ކަމަށްވާތީ އެ ނަގަހައްޓައި ދެމެހެއްޓުމަކީ އެންމެ ބޮޑު އެއް ޒިންމާ ކަމަށް ވިދާޅުވި އެވެ.
އާޒިމް ވިދާޅުވީ އޭނަ މޭޔަރުގެ ދައުރު ނިންމަވާލައްވާނީ އެމްޑީޕީގެ މެންބަރެއްގެ ގޮތުގައި ކަމަށާއި އެ ފިކުރު ބަދަލެއް ނުވާނެ ކަމަށެވެ.
"ފެށުނީއްސުރެ ވެސް އަޅުގަނޑު ބުނަމުން އަންނަ ވާހަކައެއް އެއީ، އެމްޑީޕީގެ ސިޔާސަތުތަކުގައޭ އަޅުގަނޑުގެ ހިތް އޮތީ،.އެމްޑީޕީގެ ސިޔާސަތުތައް އަޅުގަނޑުމެން ޅަ އިރުއްސުރެ ފެށިގެންވެސް އަޑުއިވި، އެ ސިޔާސަތުތަކަކީ އަޅުގަނޑަށް ޤަބޫލު ކުރެވޭ ސިޔާސަތުތަކަކަށްވާތީ އަޅުގަނޑު އެމްޑީޕީއަށް ޖޮއިން ކުރީ،" އާޒިމް ވިދާޅުވި އެވެ. "އެހެންވީމާ އެ ސިޔާސަތުތައް ދަމަހައްޓާ ނަގަހައްޓާ ކުރިއަށް ގެންދިއުމަކީ އަޅުގަނޑުގެ އެންމެ ބޮޑު އެއް ޒިންމާ އަދި ފަޚުރު. އެގޮތުގައި އަޅުގަނޑުވެސް ސާބިތުވެ ހުންނާނަން."
އޭނަ ރައްޔިތުންނަށް ރަނގަޅުވާނެ ކަންކަން ހުރީ އެމްޑީޕީގައި ކަމަށާއި އެ ޕާޓީއާ ގުޅިވަޑައިގަތީ ވެސް އެ ސަބަބާ ހުރެ ކަމަށެވެ.