ނުކުޅެދުންތެރިކަން ހުންނަ މީހުންގެ މަސައްކަތްތަކާއި ހުނަރު ދައްކައިލަން ބާއްވަމުން އަންނަ "ރިވެލި ކާނިވަލް" މި އަހަރުގެ އެޑިޝަން މިއަދު ފަށަން ނިންމައިފި އެވެ.
ހުޅުމާލޭގެ ސެންޓްރަލް ޕާކްގައި މި އިވެންޓް ކުރިއަށް ދާނީ މިއަދާއި މާދަމަ އެެވެ.
ސޯޝަލް އެންޑް ފެމިލީ މިނިސްޓްރީން އިންތިޒާމުކޮށްގެން ބާއްވާ "ރިވެލި ކާނިވަލް" ފަށަން ހަމަޖެހިފައި ވަނީ މިއަދު ހަވީރު 4:00 ގަ އެވެ. މިއަދާއި މާދަމާ ފެސްޓިވަލް ކުރިއަށް ދާނީ މި ހަވީރު 4:00-6:00 އަށް އަދި ރޭގަނޑުގެ 8:00-10:00 އަށެވެ.
"ރިވެލި ކާނިވަލް" ގެ މަގުސަދަކީ ނުކުޅެދުންތެރިކަން ހުންނަ ހުނަރުވެރިން ފާހަގަކޮށް އެ މީހުންގެ ހުނަރުވެރިކަމާއި، މަސައްކަތްތެރިކަން ދައްކާލައި އިޖުތިމާޢީ ހަރަކާތެއްގެ ތެރެއިން ނުކުޅެދުންތެރިކަން ހުންނަ މީހުންނަށް އިތުރު ފުރުޞަތުތަކެއް ހޯދައި ދިނުމެވެ.