ކ. މާފުށީގައި މި އަހަރު ޑޮލަރު އޭޓީމެއް ބަހައްޓާނެކަމުގެ ޔަގީންކަން ރައީސް ޑރ. މުހައްމަދު މުއިއްޒު ދެއްވައިފި އެވެ.
އާންމުން ކުރާ ސުވާލުތަކަށް ޖަވާބުދޭން އެ މަނިކުފާނު މިހާރު ކުރިއަށް ގެންދަވާ "ރައީސްގެ ޖަވާބު" ގައި މާފުށީ މީހަކު ކުރި ސުވާލެއްގެ ޖަވާބުގައި ރައީސް ވިދާޅުވީ މާފުށީގައި ޑޮލަރު އޭޓީއެމެއް ބެހެއްޓުމަކީ ކޮންމެހެން ކުރަން ޖެހޭ ކަމެއް ކަމަށެވެ. އެހެންވެ މަސައްކަތް ބޭންކް އޮފް މޯލްޑިވްސް (ބީއެމްއެލް) އާ ގުޅިގެން ކުރިއަށް ގެންދަވާނެ ކަމަށެވެ.
"އިރާދަކުރެއްވިއްޔާ މި އަހަރު ތެރޭގައި އަޅުގަނޑުގެ ޓާގެޓަކީ ވީހާ ވެސް އަވަހަކަށް އެ އޭޓީއެމް ބެހެއްޓުން. ވަރަށް މަސައްކަތް ކުރާނަން." ރައީސް ވިދާޅުވި އެވެ.
މާފުށީގެ ބިން ހިއްކުމާ ގުޅޭގޮތުން ސުވާލު ކުރުމުން ރައީސް ވިދާޅުވީ އެ މަޝްރޫޢުގެ މަސައްކަތް ސީދާ މިއަހަރު ތެރޭގައި ނުފެށުނު ނަމަވެސް ވީހާ ވެސް އަވަހަށް މަޝްރޫޢުގެ މަސައްކަތް ފަށްޓަވާނެ ކަމަށެވެ. އަދި އެމަނިކުފާނު މަސައްކަތް ކުރައްވަނީ ދައުރުގެ ފަހު އަހަރަށް މަޝްރޫޢުތައް ބަހައްޓަން ނޫން ކަމަށާއި، ރައްޔިތުންނަށް ފައިދާ ހުރި އެފަދަ މަޝްރޫޢުތައް ވީހާ ވެސް އަވަހަށް ކުރިއަށް ގެންދަން ބޭނުންވެވަޑައިގަންނަވާ ކަމަށް ރައީސް ވިދާޅުވި އެވެ.
މާފުއްޓަކީ ރާއްޖޭގައި އެންމެ ފުޅާކޮށް ލޯކަލް ޓޫރިޒަމް ހިންގަމުން އަންނަ ރަށެވެ.