އައްޑޫ ގަން އިންޓަނޭޝަނަލް އެއާޕޯޓްގެ ފިއުލް ފާމް ބޮޑުކޮށް، އެތަން ހިންގާނެ ބަޔަކު ހޯދަން ހުޅުވާލައިފި އެވެ.
އެ އެއާޕޯޓް ހިންގާ ކުންފުނި، އައްޑޫ އިންޓަނޭޝަނަލް އެއާޕޯޓް (އޭއައިއޭ) އިން މިއަދު ބުނީ ފިއުލް ފާމް ބޮޑުކޮށް، އެތަން އޮޕަރޭޓްކުރަން ޝައުގުވެރިވާ ފަރާތްތަކަށް އެކްސްޕެރެޝަން އޮފް އިންޓަރެސްޓް (އީއޯއައި) ހުށަހެޅުމުގެ ފުރުސަތު މި މަހުގެ 29 އާ ހަމައަށް ހުޅުވާލާފައިވާ ކަމަށެވެ.
ގަން އެއާޕޯޓަކީ ގިނަ އަދަދަކަށް ބޭރުގެ ޖެޓްތައް ވެސް ޖައްސާ އެއާޕޯޓަކަށްވާ އިރު، އެތަނުގެ ފިއުލް ފާމަކީ އެއާޕޯޓްގެ ނއެންމެ މުހިއްމު އެއް ބައެވެ. ގަމަށް މި ވަގުތު ދަތުރުތައް ބާއްވަނީ އެންމެ ދެ އެއާލައިނަކުންނެވެ. އެއީ އެތެރޭގެ ހިދުމަތް ދެމުން އަންނަ މޯލްޑިވިއަންގެ އިތުރުން ގަމާއި ސްރީ ލަންކާއާ ދޭތެރޭ ދަތުރުތައް ބާއްވަމުން އަންނަ ސްރީ ލަންކަން އެއާލައިންސެވެ.
ގަން އެއާޕޯޓްގެ ފިއުލް ފާމް ބޮޑުކޮށް، އެތަން އޮޕަރޭޓްކުރާނެ ބަޔަކު ހޯދަން ހުޅުވައިލި އިރު، މި އެއާޕޯޓް ތަރައްގީ ކުރުމުގެ ބިޔަ މަޝްރޫއެއް މިހާރު އަންނަނީ ހިންގަމުންނެވެ. އެއީ އިންޑިއާގެ ރެނާޓަސް ކުންފުންޏާ ހަވާލުކޮށްގެންނެވެ.
އެއާޕޯޓް ތަރައްގީ ކުރުމުގެ މަޝްރޫއުގެ ތެރެއިން ޒަމާނީ ފެންވަރަށް ޓާމިނަލް ތަރައްގީކޮށް، ޑިއުޓީ ފްރީ ފިހާރަތަކާއި ރެސްޓޯރެންޓުތަކާއި ލައުންޖުތަކުގެ އިތުރުން، އައު ކޮންޓްރޯލް ޓަވަރަކާއި ފަޔަ ސްޓޭޝަނެއް ގާއިމުކުރަން ހަމަޖެހިފައިވެ އެވެ. އަދި އެއާޕޯޓުގައި ކޯލްޑް ސްޓޯރޭޖަކާ އެކީ ކާގޯ ވަސީލަތްތައް އިތުރަށް ތަރައްޤީކޮށް، މަގުތައް ހަދައި ޕާކިންގެ އިތުރުން މަގުތައް ހެދުމާއި އެއާޕޯޓަށް ބޭނުންވާ އެހެނިހެން ވަސީލަތްތައް ވެސް ތަރައްގީކުރަން ހަމަޖެހިފައިވެ އެވެ.
ދެހާސް ފަންސަވީހަށް ނިންމަން ހަމަޖެހިފައި މި މަޝްރޫއަށް 29.7 މިލިއަން ޑޮލަރު (455.8 މިލިއަން ރުފިޔާ) ހަރަދު ވާނެ އެވެ. މިއީ އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ހިންގާ މަޝްރޫޢުއެކެވެ.
ގަން އެއާޕޯޓް ތަރައްގީ ކުރުމުގެ މަޝްރޫއު އިފުތިތާހުކުރީ މިދިޔަ އަހަރުޖެ ޖޫން 4 ގަ އެވެ.