މި އަހަރުގެ މަޖިލިސް އިންތިހާބަށް ވާދަރާ އަންހެނުންގެ ނިސްބަތަކީ 10 ޕަސެންޓް ކަމަށް ކަމަށް އިލެކްޝަންސް ކޮމިޝަން (އީސީ) ގެ ނައިބު ރައީސް އިސްމާއިލް ހަބީބު ވިދާޅުވެއްޖެ އެވެ.
އޭނަ ސޯޝަލް މީޑިއާ ޕޯސްޓެއްގައި ވިދާޅުވީ މަޖިލީހުގެ 93 ދާއިރާއަކަށް 368 ކެންޑިޑޭޓަކު ވާދަކުރާ އިރު، އިންތިހާބުގައި ވާދަކުރަނީ އެންމެ 10.76 ޕަސެންޓް އަންހެނުން ކަމަށެވެ. އެއީ 41 ކެންޑިޑޭޓުންނެވެ.
މަޖިލިސް އިންތިހާބުގައި ވާދަކުރާ ޕާޓީތަކަށް ބަލާ އިރު އެންމެ ގިނަ އަންހެން ކެންޑިޑޭޓުން ވާދަކުރަނީ ރާއްޖޭގައި އެންމެ ފަހުން އުފެދުނު ޕާޓީ، ދަ ޑިމޮކްރެޓްސްއިންނެވެ. އެ ޕާޓީން 41 ދާއިރާއަކަށް ވާދަކުރާ އިރު، އަންހެން 13 ކެންޑިޑޭޓަކު ވާދަކުރެ އެވެ.
ރާއްޖޭގެ ސިޔާސީ މައިދާނަށް ނުކުންނަ އަންހެނުން ފަހަކަށް އައިސް އިތުރުވަމުން ދިޔަ ނަމަވެސް ފިރިހެނުންނާ އަޅާބަލާ އިރު، އަންހެނުމްގެ ނިސްބަތް އެ ދާއިރާގައި ވަރަށް ދަށެވެ. އެގޮތުން މަޖިލީހުގައި ވެސް އަންހެން މެންބަރުންގެ ހިއްސާ ވަރަށް ކުޑަ އެވެ.
މި އަހަރު ބާއްވާ 20 ވަނަ މަޖިލިސް އިންތިހާބަށް ވާދަކުރާ ކެންޑިޑޭޓުންގެ ނަންތައް އީސީން ވަނީ އިއްޔެ ތަރުތީބުކޮށްފަ އެވެ. އިންތިހާބަށް ވާދަކުރަން މިދިޔަ މަހުގެ 30 ގައި ހުޅުވާލި ސުންގަޑި ހަމަވީ މި މަހުގެ 14 އަށެވެ. ސުންގަޑި ހަމަވި އިރު، 381 މީހަކު ފޯމް ހުށަހެޅި އެވެ. އެކަމަކު ހަތަރު މީހަކު ވަނީ ނަން އަނބުރާ ގެންގޮސްފަ އެވެ.