އާންމު އާންމު އިންތިހާބު ބޯމަތިވެފައި ވަނިކޮށް އިންޑިއާގެ އެންމެ ބޮޑު އިދިކޮޅު ޕާޓީ، ކޮންގްރެސްގެ އެކައުންޓްތައް ފްރީޒްކޮށްފި އެވެ.
އެ ޕާޓީގެ ލީޑަރެއް ކަމަށްވާ މަލިކަރަޖުން ކަރްގޭ އިއްޔެ ވިދާޅުވީ އިންކަމް ޓެކްސް ޑިޕާޓްމަންޓުން ކޮންގްރެސްގެ ބޭންކް އެކައުންޓްތައް ފްރީޒްކުރިކަން އެނގުނީ މީގެ ދެ ދުވަސް ކުރިން ކަމަށެވެ. އަދި އެކަން އެނގުނީ ޕާޓީގެ ޗެކްތަކަށް ބޭންކްތަކުން ފައިސާ ދޫނުކުރުމުން، ވީ ގޮތް ބެލުމުން ކަމަށް ވިދާޅުވި އެވެ.
އެކައުންޓްތައް ފްރީޒްކުރި މައްސަލާގައި ކޮންގްރެސް އިން ބުނީ މިއީ ކެމްޕޭނަށް ވެސް ދަތިކުރަން ވެރިކަން ކުރާ ޕާޓީ، ބީޖޭޕީ އަޑީގައި އޮވެގެން ކުރުވި ކަމެއް ކަމަށާއި މިފަދަ ކަންކަމަކީ ޑިމޮކްރަސީ އަށް ދޭ ހަމަލާތައް ކަމަށެވެ.
ކޮންގްރެސް އިން ބުނި ގޮތުގައި އެ ޕާޓީގެ އެކައުންޓްތަކުގައި ހުންނާނީ ޕާޓީގެ އެކި ކަންކަމަށް ފަންޑް ހޯދަން އޮންލައިންކޮށް ކުރިިއަށް ގެންދާ ކްރައުޑްފަންޑިން އާއި މެންބަޝިޕް ފީތަކުން ލިބިފައިވާ ފައިސާ އެވެ. ފްރީޒްކުރި އެކައުންޓްތަކުގެ ތެރޭގައި ކޮންގްރެސްގެ ޔޫތު ވިންގު، "އިންޑިއަން ޔޫތު ކޮންގްރެސް" ގެ އެކައުންޓް ވެސް ހިމެނެ އެވެ.
މަލިކަރަޖުން ވިދާޅުވީ އެކައުންޓްތައް ފްރީޒްކުރުމާ ގުޅިގެން ކޮންގްރެސްގެ ހަރަކާތްތަކަށް އެކަމުގެ ނޭދެވޭ އަސަރު ވަރަށް ބޮޑަށް ކުރާނެ ކަމަށެވެ.
"އެގޮތުން ޕާޓީގެ އޮފީސްތަކުގެ ކަރަންޓް ބިލްތައް ދެއްކުމާއި މުވައްޒަފުންގެ މުސާރަ ވެސް މިކަމާ ހެދި ނުދެވޭނެ." އޭނަ ވިދާޅުވި އެވެ.
އަވަހާރަކޮށްލާފައިވާ ކުރީގެ ބޮޑުވަޒީރު ރަޖީވް ގާންދީގެ ދަރިކަލުން، ރާހުލް ގާންދީ އިސްކޮށް ހުންނަވާ ކޮންގްރެސް އިން މިހާރު ވަނީ ވަގުތީ ގޮތުން އެކައުންޓްތައް ދޫކޮށްދޭން އިންކަމް ޓެކްސް ޑިޕާޓްމަންޓްގައި އެދިފަ އެވެ.