އެމްޑީޕީގެ ރައީސް ކަމަށް ކުރީގެ ފޮރިން މިނިސްޓަރު އަބްދުﷲ ޝާހިދު ވާދަކުރައްވާނެ ކަމަށް ބެލެވެން ފަށައިފި އެވެ.
އެ ޕާޓީގެ އޮފިޝަލުންތަކެއްގެ ފަރާތުން އެނގިފައިވާ ގޮތުގައި ރާއްޖޭގެ އެންމެ ބޮޑު ޕާޓީގެ ރައީސް ކަމަށް ޝާހިދު ޝައުގުވެރިވަޑައިގަންނަވަ އެވެ. އެކަމަކު އެކަން އޭނަ އަދި ރަސްމީކޮށް އިއުލާނެއް ނުކުރައްވަ އެވެ. ޝާހިދަކީ އެމްޑީޕީގައި ވަރަށް އިސްކޮށް އުޅުއްވާ ބޭފުޅެކެވެ.
އެމްޑީޕީގެ ރައީސްކަމަށް ވާދަކުރަން ހުޅުވައިލީ މިދިޔަ ހަފުތާގަ އެވެ. ކުރިމަތިލާން ދިން މުއްދަތު އަންނަ އަންގާރަ ދުވަހަށް ހަމަވާނެ އެވެ. އެ މަގާމަށް ކުރިމަތިލާން ނިންމެވިލަން އެމްޑީޕީގެ އެއްވެސް ބޭފުޅަކު އަދި އިއުލާނެއް ނުކުރައްވަ އެވެ.
އެ ޕާޓީގެ ރައީސްގެ މަގާމުގައި އެންމެ ފަހުން ހުންނެވި ކުރީގެ ރައީސް މުހަންމަދު ނަޝީދު މިދިޔަ އަހަރު އެ ޕާޓީން ވަކިވެ ވަޑައިގަތުމާ ގުޅިގެން އެމްޑީޕީގެ ގައުމީ މަޖިލީހުން ވަނީ ވަގުތީ ގޮތުން ޕާޓީގެ ރައީސްގެ މަގާމަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ހަމަޖައްސައިފަ އެވެ.