އައްޑޫ ސިޓީ ހިތަދޫ އާއި ހުޅުމީދޫ ދެމެދު އެޅުމަށް ހަމަޖެހިފައިވާ ބްރިޖުގެ ސާވޭ މަސައްކަތުގެ އެއްބަސްވުމުގައި މާދަމާ ސޮއިކުރުމަށް ހަމަޖެހިއްޖެ އެވެ.
މި އެއްބަސްވުމުގައި ސޮއިކުރުމަށް ހަމަޖެހިފައިވަނީ ރައީސް ޑރ. މުހައްމަދު މުއިއްޒު މާދަމާ ރޭ އައްޑޫ ސިޓީ ހިތަދޫގެ ރައްޔިތުންނާއެކު ބާއްވާ ބައްދަލުވުމެއްގަ އެވެ.
މި ބައްދަލުވުމުގައި ބްރިޖު މަޝްރޫއުގެ ޕްރިލިމިނަރީ ޑިޒައިން އަދި ސާވޭ މަސައްކަތުގެ އެއްބަސްވުމުގައި ސޮއިކުރުމަށް ވަނީ ހަމަޖެހިފަ އެވެ.
މި މަސައްކަތް ހަވާލުކުރުމަށް ހަމަޖެހިފައިވަނީ މިސްރުގެ ދަ އަރަބް ކޮންޓްރެކްޓާސް ކުންފުންޏާ އެވެ. އެ ކުންފުނިން ބްރިޖުގެ ސާވޭގެ މަސައްކަތްތައް ހިލޭ ސާބަހަށްކޮށްދޭނެ ކަމުގެ އިޝާރާތެއް ދީފައިވާ ކަމަށް ސަރުކާރުން ވަނީ ބުނެފަ އެވެ.
ބްރިޖާއި ގުޅޭ ސާވޭ އާއި ތަފާތު އެކި ދިރާސާތަކުގެ މަސައްކަތް ނިންމަން އެ ކުންފުންޏަށް ދިނުމަށް ހަމަޖެހިފައިވަނީ ތިން މަސް ދުވަހުގެ މުއްދަތެއް ކަމަށް ސަރުކާރުން ބުނެ އެވެ. އެ މުއްދަތުގެ ތެރޭގައި ބްރިޖާއި ގުޅޭ އިތުރު މަޝްވަރާތަކެއް އެހެން އެއްވެސް ފަރާތަކާއި ނުކުރަން ވެސް ނިންމާފައިވާ ކަމަށް ސަރުކާރުން ބުނެ އެވެ.
ބްރިޖާއި ގުޅިގެން ހަދަންޖެހޭ ތަފާތު އެކި ސްޓަޑީޒްތައް ހެދުމަށް ހޭދަވާނެ ކަމަށް ބެލެވޭ ދެ މިލިއަން ޑޮލަރަކީ ސަރުކާރުން ދައްކަން ޖެހޭ ފައިސާއެއް ނޫން ކަމަށް ސަރުކާރުން ވަނީ ބުނެފަ އެވެ.
އައްޑޫ ބްރިޖަކީ ރައީސް މުއިއްޒުގެ ރިޔާސީ ވައުދެކެވެ. އެގޮތުން އެ މަނިކުފާނުގެ "ހަފުތާ 14" ނުވަތަ ވެރިކަމުގެ ފުރަތަމަ 100 ދުވަހުގެ ތެރޭގައި ބްރިޖާ ގުޅުން ހުރި މުހިއްމު ކަންތައްތަކެއް ރާވާފައިވެ އެވެ. އެގޮތުން މިވަގުތު އެންމެ އިސްކަމެއް ދީފައި ވަނީ ބްރިޖުގެ ޑިޒައިނާ އެކީ ފީސިބިލިޓީ ސްޓަޑީއެއް ހެދުމުވެ.
ހިތަދޫ އާއި ހުޅުމީދޫ ދެމެދު އެޅުމަށް ހަމަޖެހިފައިވާ ބްރިޖުގެ ސާވޭ އަށް 30 މިލިއަން ރުފިޔާ މި އަހަރުގެ ބަޖެޓުގައި ވަނީ ހިމަނައިފަ އެވެ.