ރައްޔިތުންގެ މަޖިލިސް އިންތިހާބުގައި ވާދަކުރާ ކެންޑިޑޭޓުންނަށް އެ މީހުންގެ މަންދޫބުން ކަނޑައެޅުމުގެ ފުރުސަތު ހުޅުވާލައިފި އެވެ.
އިލެކްޝަންސް ކޮމިޝަން (އީސީ) އިން ބުނީ އިންތިހާބުގެ ވޯޓު ނެގުމާއި ވޯޓު ގުނުމުގެ ކަންތައްތައް ހިނގާ ނުހިނގާ ގޮތް ބެލުމަށް، އެ ކެންޑިޑޭޓެއްގެ މަސްލަހަތު ހިމެނޭ ކޮންމެ މަރުކަޒަކަށް މަންދޫބަކު އައްޔަން ކުރުމުގެ ފުރުސަތު މިހާރު ހުޅުވާލާފައިވާ ކަމަށެވެ.
މަންދޫންނަށް އައްޔަންކުރާ މީހުންގެ ޝަރުތަތަކުގެ ތެރޭގައި މަންދޫބުންގެ ކިބައިގައި ހުންނަށް ޖެހޭ ޝަރުތުތަކުގެ ތެރޭގައި 18 އަހަރުވެފައިވާ ދިވެއްސަކަށްވުމާއި ޖިނާއީ ކުށެއްގައި ޙުކުމް ތަންފީޒު ކުރަމުންދާ މީހަކަށް ނުވުމާއި ފަނޑިޔާރެއް ނުވަތަ މިނިވަން މުއައްސަސާއެއްގެ މެންބަރެއް/ވެރިއަކަށް ނުވުމާއި ފުލުހެއް ނުވަތަ ސިފައިންގެ މީހަކަށް ނުވުމާއި ކުށެއްގެ ތުހުމަތުގައި ބަންދުކޮށްފައި ހުރި މީހަކަށް ނުވުމާއި ސުލޫކީ މިންގަނޑާ ޚިލާފުވެގެން ފިޔަވަޅެއް އަޅައިފައިވާ މީހަކަށް ނުވުމާއި އިންތިޚާބީ ކުށެއް ފާއިތުވި ފަސް އަހަރު ދުވަހުގެ ތެރޭގައި ސާބިތުވެފައިވާ މީހަކަށް ނުވުން ހިމެނެ އެވެ.
އިސީން ބުނީ ކެންޑިޑޭޓުން ކަނޑައަޅާ މަންދޫބުންނަަށް އެތަނުން ޑިޖިޓަލް ފާހެއް ދޫކުރާނެ ކަމަށެވެ. އަދި އެ މަންދޫބުން އީސީން ކުރިއަށް ގެންދާ މައުލޫމާތު ސެޝަންތައް ފުރިހަމަ ކުރަން ޖެހޭނެ އެވެ.
މަންދޫބުން އައްޔަނު ކުރުމުގެ ސުންގަޑި ހަމަވާނީ މި މަހުގެ 24 ވަނަ ދުވަހުގެ މެންދުރު ފަހު 3:00 އަށެވެ.
ވިހި ވަނަ މަޖިލިސް އިންތިހާބުގެ 93 ދާއިރާއަކަށް 368 ކެންޑިޑޭޓުން ވާދަކުރެ އެވެ. މީގެ ތެރެއިން 130 ކެންޑިޑޭޓުންނަކީ އަމިއްލަ ގޮތުން ވާދަކުރާ ކެންޑިޑޭޓުންނެވެ.
މަޖިލިސް އިންތިހާބު ބާއްވަން އީސީން ނިންމާފައި އޮތީ އަންނަ މަހުގެ 17 އެވެ. ނަމަވެސް އިންތިހާބު ރޯދަ މަހާ ދިމާވާތީ، ރޯދަ މަސް ނިމޭތާ 10 ދުވަސް އިންތިހާބު ބާއްވަން މަޖިލީހުން އޮތީ ފާސްކޮށްފަ އެވެ.