މި އަހަރުގެ މިހާތަނަށް ރާއްޖެ އައި ޓޫރިސްޓުންގެ އަދަދު 300،000 އިން މަތިވެއްޖެ އެވެ.
ޓޫރިޒަމް ދާއިރާގެ އެންމެ ފަހުގެ ތަފާސްހިސާބުތައް ދައްކާ ގޮތުން އިއްޔެގެ ނިޔަލަށް ރާއްޖެ އަށް ޖުމްލަ 326،424 ޓޫރިސްޓުން ވަނީ އައިސްފަ އެވެ.
މި އަހަރުގެ މިހާތަނަށް އެންމެ ގިނަ ޓޫރިސްޓުން އައިސްފައި ވަނީ ޗައިނާއިންނެވެ. އެ ގައުމުން 47،185 ޓޫރިސްޓުން އައިސްފައިވާ އިރު، މިހާރު ދެވަނައިގައި އޮތް އިޓަލީން 31،039 ޓޫރިސްޓުން އަދި ރަޝިއާ އިން 30،927 ޓޫރިސްޓުން އައިސްފައިވެ އެވެ.
ރާއްޖޭގެ ގަދަ 10 މާކެޓަށް ބަލާ އިރު، އިނގިރޭސިވިލާތުން 28،858 ޓޫރިސްޓުން، އިންޑިއާ އިން 22،555 ޓޫރިސްޓުން، ޖަރުމަނުން 19،761 ޓޫރިސްޓުން، ފްރާންސުން 11،784 ޓޫރިސްޓުން، އެމެރިކާ އިން 10،621 ޓޫރިސްޓުން، ޕޮލެންޑުން 8،526 ޓޫރިސްޓުން އަދި ސްވިޓްޒަލޭންޑުން 7،226 ޓޫރިސްޓުން އައިސްފައިވެ އެވެ.
ރާއްޖޭގެ މި އަހަރުގެ ޓާގެޓަކީ މަދުވެގެން 2.3 މިލިއަން ޓޫރިސްޓުން ގެނައުމެވެ.