އެމްޑީޕީގެ ރައީސް ކަމަށް ކުރިމަތިލާން ނިންމިކަން ކުރީގެ ފޮރިން މިނިސްޓަރު އަބްދުﷲ ޝާހިދު އިއުލާންކުރައްވައިފި އެވެ.
އޭނަ އެ މަގާމަށް ވާދަކުރައްވާނެ ކަމަށް އިއްޔެ އަޑު އަރާފައި ވަނިކޮށް މިއަދު ސޯޝަލް މީޑިއާ ޕޯސްޓެއްގައި ޝާހިދު ވިދާޅުވީ ރާއްޖޭގެ އެންމެ ބޮޑު ޕާޓީގެ ރައީސްކަމުގެ މަޤާމަށް ކުރިމަތިލައްވަން ގަސްތުކޮށްފިން ކަމަށަވެ.
"އައު ފޯރިޔަކާއި އައު ޖޯޝަކާއި އެކު، އާބާރެއްގައި އެމްޑީޕީ ނިކުމެ ރައްޔިތުން އެދޭ މިސްރާބަށް ރާއްޖެ އަލުން ގެންދިޔުމަށް އެންމެން އެކުވެ އަތުގުޅާލަންވެއްޖެކަން ބަލާލި ކޮންމެ ދިމާލަކުން މިއަދު މިއޮތީ ފެންނަން،" އޭނަ ވިދާޅުވި އެވެ.
މާތް ﷲގެ ވާގިފުޅާއި އެކު އެމް ޑީ ޕީ ގެ @MDPSecretariat ރައީސްކަމުގެ މަޤާމަށް ކުރިމަތިލުމަށް އަޅުގަނޑު ގަސްތުކޮށްފީމެވެ.
އައު ފޯރިޔަކާއި އައު ޖޯޝަކާއި އެކު، އާބާރެއްގައި އެމް ޑީ ޕީ ނިކުމެ ރައްޔިތުން އެދޭމިސްރާބަށް ރަާއްޖެ އަލުން ގެންދިޔުމަށް އެންމެންއެކުވެ… pic.twitter.com/wuxMnG1kiN
— Abdulla Shahid (@abdulla_shahid) February 18, 2024
ޝާހިދު ވަނީ ވަނީ ޕާޓީގެ މެމްބަރުންގެ ތާއީދާއި އެއްބާރުލުމަށް ވެސް އެދިވަޑައިގެންފަ އެވެ.
އެމްޑީޕީގެ ރައީސްކަމަށް ހުޅުވައިލީ މިދިޔަ ހަފުތާގަ އެވެ. އަދި ކުރިމަތިލާން ދިން ސުންގަޑި ހަމަވާނީ އަންގާރަ ދުވަހު އެވެ.
އެ ޕާޓީގެ ރައީސްގެ މަގާމުގައި އެންމެ ފަހުން ހުންނެވި ކުރީގެ ރައީސް މުހަންމަދު ނަޝީދު މިދިޔަ އަހަރު އެ ޕާޓީން ވަކިވެ ވަޑައިގަތުމާ ގުޅިގެން އެމްޑީޕީގެ ގައުމީ މަޖިލީހުން ވަނީ ވަގުތީ ގޮތުން ޕާޓީގެ ރައީސްގެ މަގާމަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ހަމަޖައްސައިފަ އެވެ.