ރައީސް ޑރ. މުހައްމަދު މުޢިއްޒު މިހާރު ދެކުނަށް ކުރައްވަމުން ގެންދަވާ ދަތުރުފުޅުގެ ތެރެއިން ހިތަދޫ ރައްޔިތުންނާއި އެކު ބާއްވަން ހަމަޖެހިފައިވާ ބައްދަލުވުން ކެންސަލްކޮށްފިއެވެ.
ރައީސް ޑރ. މުއިއްޒު އައްޑޫސިޓީއަށް ވަޑައިގެންނެވީ މިއަދު މެނދުރެއް ހާއިރު އެވެ. ގަމުގެ ވައިގެ ބަނދަރުން ރައީސް އަށް އައްޑޫސިޓީ މޭޔަރ އަލީ ނިޒާރު ވަނީ މަރުހަބާ ދަންނަވާފައެވެ. ރައީސްގެ މި ދަތުރުފުޅުގައި އައްޑޫގެ އަވަށްތަކުގެ ރައްޔިތުންނާއި ބައްދަލު ކުރަން ވަނީ ހަމަޖެހިފައެވެ. އޭގެ ތެރެއިން މިއަދު މެނދުރުފަހު ހިތަދޫ ބައްދަލުވުން ބާއްވަން ހަމަޖެހިފައި އޮތީ އައްޑޫ ހައި ސްކޫލު ހޯލުގައެވެ.
މި ބައްދަލުވުން ފަށަން އޮތީ 2:00 ޖެހިއިރު ކަމަށްވީނަމަވެސް، 3:00 ޖެހިއިރުވެސް ޖަލްސާ ފެށިފައި ނުވެއެވެ. އެވަގުތު ހޯލުގައި އައްޑޫގެ ޕީއެންސީއަށް ނިސްބަތްވާ މެންބަރުންނާއި ކެނޑީޑޭޓުން އަދި ސަރުކާރުގެ ބައެއް އިސްވެރިންވެސް ތިއްބެއެވެ. ނަމަވެސް ޖަލްސާ ހޯލުގައި ތިބީ އާންމުކޮށް އެފަދަ ބައްދަލުވުންތަކަށް ދާ މީހުންނަށް ވުރެ މަދު އަދަދެކެވެ.
ގާތްގަނޑަކަށް 3:00 ޖެހިއިރު، ރައީސް ރައްޔިތުންނާއި ބައްދަކުރުން ކެންސަލްވިކަން އިއުލާންކޮށްފައެވެ. އެގޮތުން ރައީސް އެވަގުތުވެސް ހުންނެވީ ކައުންސިލާއެކު ބާއްވަމުންދާ ބައްދަލުވުމުގައި ކަން ފާހަގަކޮށް، ނަމާދު ގަޑިވެސް ކައިރިވުމާއި އަދި ހަވީރު މަރަދޫ-ފޭދޫ އިރުޝާދިއްޔާ ސްކޫލުގައި ރައްޔިތުންގެ ބައްދަލުވުމެއް އޮތުމާއިއެކު، ހިތަދޫ ބައްދަލުވުން ކެންސަލް ވެފައިވާ ކަމަށް ވަނީ އަނގާފައެވެ. މިއާއެކު މިރޭ ފޭދޫ ސްކޫލުގައި ބޭއްވުމަށް ހަމަޖެހިފައިވާ ބައްދަލުވުމުގައި ހިތަދޫ އަދި ފޭދޫ ރައްޔިތުންނާއި އެއްކޮށް ބައްދަލު ކުރައްވާނެ ކަމަށާއި، ހިތާދޫއިން ބަސް ދަތުރުތައް ހަމަޖެހޭނެ ކަމަށް ވަނީ އިއުލާން ކުރައްވާފައެވެ.
ދެކުނުގެ ހަތަރު އަތޮޅަށް ރައީސް ކުރައްވާ މި ދަތުރުފުޅުގެ ތެރެއިން އައްޑޫގެ 4 ބައްދަލުވުމެއް ބޭއްވުމަށް ވަނީ ރޭވިފައެވެ. އެއީ ހިތަދޫ، މަރަދޫ-ފޭދޫ އަދި މިރޭ ބާއްވާ ފޭދޫ ރައްޔިތުންގެ ބައްދަލުވުމާއެކު މާދަމާ ބާއްވާ ހުޅުމީދޫ ރައްޔިތުންގެ ބައްދަލުވުމެވެ. މި ބައްދަލުވުންތަކުގައި އެ އަވަށްތަކަށް ސަރުކާރުން ކޮށްދެއްވާނެ ކަންކަމާއި ސަރުކާރުގެ އަމާޒުތައް ރައްޔިތުންނާއި ހިއްސާ ކުރުމަށް ވަނީ ހަމަޖެހިފައެވެ.
އައްޑޫ ބްރިޖުގެ ސާވޭ މަސައްކަތް ހަވާލުކުރަންވެސް މި ދަތުފުޅުގެ ތެރޭގައި ވަނީ ހަމަޖެހިފައެވެ. މައުލޫމާތު ލިބިފައިވާ ގޮތުގައި މި މަސައްކަތް ހަވާލު ކުރާނީ މާދަމާ ބާއްވާ ހުޅުމީދޫ ރައްޔިތުންގެ ބައްދަލުވުމުގައެވެ.