ފައިސާ ޗާޕްކުރުން ހުއްޓާލުމަކީ މި ސަރުކާރުން ރާއްޖޭގެ އިގުތިސާދު ކުރިއަށް ގެންދަން އެޅި އެންމެ މުހިންމު ފިޔަވަޅު ކަމަާް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރޭ އައްޑޫ ފޭދޫ ސްކޫލުގައި ބޭއްވި ޖަލްސާގައި އެ މަނިކުފާނު ވިދާޅުވީ ފައިސާ ޗާޕްކުރުން ހުއްޓާލުން އެއީ ފަސޭހަ ނިންމުމެއް ނޫން ނަމަވެސް އެކަން އެގޮތަށް ނުކުރި ނަމަ މިއަދު ވެސް ޤައުމުގެ މާލީ ހާލަތު އޮތް ވަރަށް ވުރެ އިތުރަށް ގޯސްވާނެ ކަމަށެވެ.
ރައީސް ވިދާޅުވީ މި ސަރުކާރު ވެރިކަމާ ހަވާލުވި އިރު، ދައުލަތަށް 120 ބިލިޔަން ރުފިޔާގެ ދަރަނި ވާރުތަވެފައިވާ ކަމަށެވެ. އަދި ފާއިތުވި ފަސްއަހަރުގެ ތެރޭގައި ފައިސާ ޗާޕުކުރި ވަރު އޭގެ ކުރީގެ 40 އަހަރު ޗާޕުކުރި ވަރަށް ވުރެ ގިނަ ކަމަށް ވިދާޅުވި އެވެ.
އެ މަނިކުފާނު ވިދާޅުވީ ރާއްޖޭގެ އިގުތިސާދީ ހާލަތު އޮތް ގޮތަށް ބަލާއިރު ފައިސާ ޗާޕްކުރުން ހުއްޓާލުމަށާއި، ހާލަތު ބަދަލު ކުރުމަށް ސަރުކާރުން އެޅި ފިޔަވަޅުތަކަކީ މިހާލަތުގައި އޮތް އެއްވެސް ޤައުމަކުން ނުނިންމާ ފަދަ ހިތްވަރު ގަދަ ނިންމުމެއްކަން ބައިނަލްއަޤްވާމީ މާލީ އިދާރާތަކުންވެސް ފާހަގަކުރާ ކަމަށެވެ.
އަދި ސަރުކާރުން ލޯނު ނަގައިގެން ކުރިއަށް ގެންދާ ބޮޑެތި މަޝްރޫޢުތައް ވެސް ކުރިއަށް ގެންދާނީ ދިވެހިންނަށް އޭގެ މަންފާ ކުރާގޮތަށްކަން ފާހަގަ ކުރައްވައި، އައްޑޫ ބުރިޖުގެ މަސައްކަތްވެސް ކުރިއަށް ގެންދާނީ އެގޮތަށް ކަމަށް ވިދާޅުވިއެވެ.