ސަރުކާރުން އައްޑޫގައި އަޅަން ނިންމާފައުވާ ބްރިޖްގެ އެމްއޯޔޫގައި މިއަދު ސޮއިކޮށްފި އެވެ.
އެ އެމްއޯޔޫގައި ސޮއިކުރީ ރައީސް ޑރ. މުހައްމަދު މުއިއްޒު މިހާރު އައްޑު އަށް ކުރައްވަމުން ގެންދަވާ ދަތުރުގެ ތެރެއިން ހުޅުމީދޫގައި ބޭއްވި ޖަލްސާގަ އެވެ. އެގޮތުން ހުޅުމީދު އާއި ހިތަދޫގެ ބްރިޖްގެ ފީސިބިލިޓީ ސްޓަޑީ އާއި ޑިޒައިންގެ މަސައްކަތް ކުރިއަށް ގެންދަން އެމްއޯޔޫގައި ސޮއިކުރީ މިސްރުގެ ކުންފުންޏެއް ކަމަށްވާ ދަ އަރަބް ކޮންޓްރެކްޓާސް ކުންފުންޏާ އެވެ.
އެމްއޯޔޫގައި ކޮންސްޓްރްކަޝަން މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. އަބްދުﷲ މުއްތަލިބެވެ. ދަ އަރަބް ކޮންޓްރެކްޓާސްގެ ފަރާތުން ސޮއިކުރެއްވީ އިންޖިނިއާ ހެބާ އަހުމަދު ލައިލާ އެވެ.
އޭނަ ވިދާޅުވީ މި ބްރިޖް ހަގީގަތަކަށް ވާނެ ކަމަށާއި އެކަމާ ދޭތެރޭ އެއްވެސް ޝައްކެއް ނެތް ކަމަށެވެ، އެގޮތުން ރައީސް މުއިއްޒުގެ މި ދައުރުގެ ތެރޭގައި ބްރިޖް ނިންމާނެކަމުގެ ޔަގީންކަން ވެސް ދެއްވާ ކަމަށް މިނިސްޓަރު ވިދާޅުވި އެވެ.
މުއްތަލިބް ވިދާޅުވި ގޮތުގައި ހުޅުމީދު އާއި ހިތަދުއާ ދެމެދު އަޅާ ބްރިޖަކީ ގާތްގަނޑަކަށް 14 ކިލޯމީޓަރުގެ ބްރިޖެއް ކަމަށެވެ. އަދި މިއާ ގުޅޭ ފީޒިބިލިޓީ ސްޓަޑި އާއި ޑިޒައިނާ ގުޅޭ މަސައްކަތްތައް ތިން މަސް ތެރޭގައި ނިމި އޭގެ ފަހުން ފައިސާ ހަމަޖެހި، ކޮންޓްރެކްޓަރަކު ވެސް ހަމަޖެހިގެން ދާނެ ކަމަށް ވިދާޅުވި އެވެ.
ބްރިޖްގެ މަސައްކަތް ކުރިއަށް ގެންދަން ނިންމާފައި ވަނީ ހުޅުމީދު އާއި ހިތަދޫގެ ރައްޔިތުންގެ ހިޔާލާއި މަޝްވަރާ ވެސް ހޯދައިގެންނެވެ.
މިއަދުގެ ރަސްމިއްޔާތުގައި ރައީސް ވިދާޅުވެފައި ވަނީ ބްރިޖްގެ އަމަލީ މަސައްކަތް މި އަހަރުގެ ތެރޭގައި ފަށާނެ ކަމަށެވެ.