މި ސަރުކާރުން އައްޑޫގައި ކުރިއަށް ގެންދަން ނިންމާފައިވާ އައްސޭރި ޓޫރިޒަމް މަޝްރޫއުގެ ތެރެއިން 6،000 އެނދު އިތުރު ކުރެވޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ މަނިކުފާނު އިއްޔެ އައްޑު އަށް ފެއްޓެވި ދަތުރުގެ ތެރެއިން މިއަދު ހުޅުމީދޫ ރައްޔިތުންނާ އެކީ ބޭއްވި ބައްދަލުވުމުގައި ވިދާޅުވީ އައްޑޫގެ ކުރިއެރުމާއި ތަރައްގީ އަކީ މުޅި އައްޑޫގެ އިގުތިސާދު ބަދަލުކޮށްލާނެ ކަމެއް ކަމަށެވެ. އެގޮތުން އައްސޭރި ޓޫރިޒަމާ އެކީ އައްޑޫގެ ޓޫރިޒަމަށް ބޮޑެތި ހެޔޮ ބަދަލުތަކެއް އަންނާނެ ކަމަށް ވިދާޅުވި އެވެ.
އެގޮތުން އައްޑޫގައި ހަދަން ނިންމާފައިވާ ސީޕްލޭން ހަބާ އެކީ މުޅި ދެކުނު ގުޅައިލެވި، މި ސަރަހައްދުގެ ޓޫރިޒަމަށް ވަރަށް ބޮޑު ބަދަލެއް އަންނާނެ ކަމަށް ވިދާޅުވި އެވެ.
ރައީސް ވިދާޅުވި ގޮތުގައި އައްޑޫ ބްރިިޖަކީ އައްޑޫގެ ތަރައްގީއާ ވަރަށް ބޮޑަށް ގުޅިފައިވާ މަޝްރޫއެކެވެ. އެގޮތުން ގަން އެއާޕޯޓް ތަރައްގީވެގެން ދިއުމާއި އެ ނޫން ވެސް އެހެން މަޝްރޫއުތަކާ އެކީ އިގުތިސާދީ އެތައް ފުރުސަތުތަކަކަށް އައްޑޫން ދޮރު ހުޅުވިގެން ދާނެ ކަމަށް ވިދާޅުވި އެވެ.
އައްޑޫގައި އައްސޭރި ޓޫރިޒަމް މަޝްރޫއެއް ކުރިއަށް ގެންދަން މަސައްކަތްކުރާ އިރު، މިކަމާ ގުޅޭ ފަސް އަހަރު ދުވަހުގެ މާސްޓަޕްލޭނެއް އެކުލަވާލުމުގެ މަސައްކަތް މިހާރު އަންނަނީ ކުރަމުންނެވެ. އެ މަސައްކަތް ހަވާލުކޮށްފައު އޮތީ ސީޑީއީ ކޮންސަލްޓިންއާ އެވެ.