އިލެކްޝަން ކޮމިޝަން (އީސީ) ގެ ނައިބު ރައީސްގެ މަގާމުގައި ހުންނެވި އިސްމާއީލް ހަބީބުގެ ދައުރު ހަމަވާތީ މެންބަރު ކަމަށް ހުޅުވައިލުމުން ކުރިމަތިލި ހަސަން ޒަކަރިއްޔާ އެ މަގާމަށް އައްޔަން ކުރުމަށްޓަކައި ރުހުން ހޯދަން ރައީސް ޑރ. މުހައްމަދު މުއިއްޒު އެ ނަން މަޖިލީހަށް ފޮނުއްވައިފި އެވެ.
ޒަކަރިއްޔާ އަކީ މިހާރު އީސީގެ ސެކްރެޓަރީ ޖެނެރަލެވެ. އޭނަގެ ނަން ފޮނުވީ މެންބަރުކަމަށް ކުރިމަތިލާން އާންމުކޮށް އިއުލާން ހުޅުވައިލުމުން ކުރިމަތިލެއްވި ބޭފުޅުންގެ ތެރެއިންނެވެ.
މަޖިލީހުގެ މިއަދުގެ ޖަލްސާގައި ރިޔާސަތުގައި އިންނެވި ނައިބު ރައީސް އަހުމަދު ސަލީމް ވަނީ ޒަކަރިއްޔާގެ ނަން ދިރާސާކުރަން މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ފޮނުވައިފަ އެވެ.
ހަބީބުގެ ދައުރު ހަމަވާނީ އަންނަ މަހުގެ 13 އަށެވެ. މިއީ އޭނަ އީސގެ މެންބަރުކަން ކުރައްވާ ދެވަނަ ދައުރެވެ. އެހެންވެ، ގާނޫނު ބުނާ ގޮތަށް ހަބީބަށް އިތުރު ދައުރަކަށް ކުރިމައްޗެއް ނުލެވޭނެ އެވެ.
އީސީގެ މިހާރުގެ ރައީސް ފުއާދު ތައުފީގު ވެސް މިހާރު ހުންނެވީ ދެވަނަ ދައުރެއްގައެވެ. އޭނާގެ ދައުރު ހަމަވާނީ ނޮވެމްބަރުގަ އެވެ.