ރާއްޖެ ބަނގުރޫޓެއް ނުވާ ކަމަށާއި ސަރުކާރުން އަންނަނީ އިގުތިސާދީ ހާލަތު ރަނގަޅު ކުރަން ހަރުދަނާ ފިޔަވަޅުތަކެއް އަޅަމުން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ މަނިކުފާނު ރާއްޖޭގެ އެންމެ ދެކުނުގެ އަތޮޅުތަކަށް މިހާރު ކުރައްވަމުން ގެންދަވާ ދަތުރުގެ ތެރެއިން މިއަދު ހުވަދު އަށް ވަޑައިގެން ގދ. ފަރެސްމާތޮޑާގައި ވިދާޅުވީ ދަރަނި ނުދެއްކި، ރާއްޖެ ސޮވެރިން ޑިފޯލްޓަކަށް ގޮސްފައިވާކަމަށް ބުނެ އިދިކޮޅުން ފަތުރަމުން ދަނީ ހަގީގަތާ ހިލާފު ދޮގު ވާހަކަތަކެއް ކަމަށެވެ.
ރައީސް ވިދާޅުވީ ދައުލަތުން ދައްކަން ޖެހޭ ދަރަނި ދައްކައި އެ އަންނަނީ ރަނގަޅަށް މެނޭޖްކުރަމުންނެވެ.
"ބޭރުގެ ދަރަނި ދައްކަމުން ބޭރަށް ޑިފޯލްޓު ނުވެ، އަޅުގަނޑުމެން ޑިފޯލްޓުވެއްޖެކަމަށް، ނޫނިއްޔާ ބަނގުރޫޓުވެއްޖެ ކަމަށް ބުނެ ދޮގުހަދަމުންދާ ދިއުން އެއީ ހަގީގަތެއް ނޫން." ރައީސް ވިދާޅުވި އެވެ.
އެ މަނިކުފާނު ވިދާޅުވީ ސަރުކާރުން އަންނަނީ ޑިފޯލްޓަކަށް ނުގޮސް ދަރަނި ދައްކައި، މުވައްޒަފުންނަށް މުސާރަ ވެސް ދީ ރައްޔިތުންނަށް ބޭނުންވާ އަސާސީ ކަންކަން ފުއްދައި ދެމުންނެވެ.
ރައީސް މުއިއްޒު ފާހަގަކުރެއްވި ގޮތުގައި ސަރުކާރުގެ އިގުތިސާދީ އެޖެންޑާ ބޭރުގެ މާލީ އިދާރާތަކުން ވެސް ބަލައިގަނެ އެވެ.
"ޚަރަދު ކުޑަކުރުމާއި އަޅުގަނޑުމެން މި ދެންނެވި ގޮތަށް ކުންފުނިތަކުން ރައްޔިތުންނަށް މި ފައިސާ ދައްކަމުން ދިއުމާއެކު، ދެން މި ދެންނެވި ގޮތަށް އަޅުގަނޑުމެންގެ ސޮވަރިން ޑިވެލޮޕްމަންޓް ފަންޑަށް ފައިސާ ޖަމާކުރުމުގެ މަސައްކަތް ކުރުމާއި، އަޅުގަނޑުމެންގެ މިހެން ހުރި ހުރިހާ ކަމެއް، އިގުތިޞާދީ ހުރިހާ ކަމެއް ރަނގަޅުކުރުމުގެ މަސައްކަތް މި ކުރަނީ." ރައީސް ވިދާޅުވި އެވެ.
އެހެންވެ ލަސްތަކެއްނުވެ އިގުތިސާދީ ހާލަތު ރަނގަޅުވާނެ ކަމަށް ވެސް ވިދާޅުވި އެވެ.