އަހަރެމެންނަށް އާއްމުކޮށް މީހުންގެ ތެރޭގައި އުޅޭ ރޮބޮޓެއް ފެންނަނީ ޓީވީ އިން ދައްކާ ކޮންމެވެސް ފިލްމަކުން ނުވަތަ ކާޓޫނަކުންނެވެ. އަދި ގިނަފަހަރަށް ރޮބަޓެއް އީޖާދު ކުރިއަސް އޭތި ވެފަ އޮންނަނީ އެހާ ބޮޑަށް އަހަރެމެންގެ ދިރިއުޅުމުގައި ބޭނުމެއް ހިފޭ އެއްޗަކަށް ނުވެފައެވެ. ނަމަވެސް ދާދި ފަހުން ޗައިނާގެ ހެލޯންޖިއާން ޕްރޮވިންސްގެ ހާބިން ސިޓީގައި ވަނީ ރޮބޮޓް ބޭނުން ކޮށްގެން ހިންގާ ރެސްޓޯރެންޓެއް ހުޅުވާފަ އެވެ.
މި ރެސްޓޯރެންޓްގައި 20 ރޮބަޓް ބޭނުންކުރާ އިރު، މިއިން ކޮންމެ ރޮބޮޓަކަށް ހާއްސަ މަސަތްކަތެއް ވަނީ ހަވާލު ކުރެވިފަ އެވެ. މި ރޮބޮޓްތަކަށް ވެއިޓަރުކަމުން ފެށިގެން ގޮސް ކައްކަންވެސް އެނގެއެވެ. މި ރެސްޓޯރެންޓްގެ އިންޖިނިއަރު ބުނެފައި ވަނީ މުޅި އެކު 500،000 ޕައުންޑް މި ރެސްޓޯރެންޓަށް ހަރަދު ކޮށްފައި ވާ ކަމަށާއި މީގެ އެންމެ ރޮބޮޓެއްގެ އަގަކީ 20،000 ޕައުންޑް ކަމަށެވެ.
މިއިން ރޮބޮޓަކަށް 2 ގަޑިއިރު ޗާޖު ކުރުމަށްފަހު 5 ގަޑިއިރު ނުހުއްޓާ މަސަތްކަތް ކުރެވެ އެވެ. 4 ފޫޓާއި 5 ފޫޓުގެ މި ރޮބޮޓްތަކަށް ތަފާތު 10 ފޭށަލް އެކްސްޕްރެށަން ވެސް ގެނެވޭ ކަމަށް މައުލޫމާތު ލިބެއެވެ. މިއީ ރޮބޮޓް ޓެކްނޮލޮޖީ ތަރައްގީ ވަމުން އަންނަ ކަމުގެ ވަރަށް ބޮޑު ހެއްކެކެވެ.