ރައްޔިތުންގެ މަޖިލީހުގެ މިއަދުގެ ޖަލްސާ ކޯރަމް ހަމަނުވުމުން ނުފެށި ލަސްވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ފެށުމަށް އެޖެންޑާކޮށްފައިވަނީ 09:00 ގައެވެ. އެހެންނަމަވެސް އޭގެ 20 މިނެޓް ފަހުންވެސް ކޯރަމް ހަމަނުވުމުން ޖަލްސާ ފެށިފައެއް ނުވެއެވެ.
ރިޔާސަތުގައި އިންނެވި މަޖިލީހުގެ ނައިބު ރައީސް އަހުމަދު ސަލީމް ވިދާޅުވީ ޖަލްސާ ނުފެށި ލަސްވަނީ ކޯރަމް ހަމަނުވާތީ ކަމަށެވެ. އެހެންކަމުން 10:00 ގައި ޖަލްސާ ފެށުމަށް އަނެއްކާވެސް މަސައްކަތް ކުރައްވާނެކަމަށެވެ.
މަޖިލީހުގެ މިއަދުގެ ޖަލްސާގެ އެޖެންޑާގައިވަނީ ނުނިމިހުރި 2 މަސައްކަތެއް އެޖެންޑާކޮށްފައިވައެވެ. އެއީ ރުހުން ނުދިން ވަޒީރުން އަލުން މަގާމަށް އައްޔަނުކުރުމުން ހުށަހެޅި މައްސަލައަކާ، މަސްވެރިންނަށް ފައިސާ ނުދޭތީ ހުށަހަޅާފައިވާ ޤަރާރެއްގެ ބަހުސް ކުރިއަށް ގެންދިއުމެވެ.