އައްޑޫ އިންޓަނޭޝަނަލް އެއާޕޯޓް ކޮމްޕެނީ (އޭއައިއޭ) ގެ މެނޭޖިން ޑިރެކްޓަރުގެ މަގާމަށް މުހައްމަދު ވަހީދު އައްޔަންކޮށްފި އެވެ.
އޭނަ އެ މަގާމަށް އައްޔަންކުރުމާ ގުޅިގެން އެ ކުންފުނިން މިއަދު ވަނީ މަރުހަބާ ވެސް ކިޔައިފަ އެވެ. އައްޑޫ ހިތަދު އަށް ނިސްބަތްވާ ވަހީދަކީ ކުރިން ގިނަ ދުވަސްތަކެއް ވަންދެން ޓޫރިޒަމް މިނިސްޓްރީގެ އިސް މަގާމުތަކެއް އަދާކުރެއްވި ބޭފުޅެކެވެ. ޓޫރިޒަމް މިނިސްޓްރީގެ އުތުރުން އޭނަ އެޑިއުކޭޝަން މިނިސްޓްރީގައި ވެސް މަސައްކަތްކުރެއްވި އެވެ.
އަދި މޯލްޑިވްސް ކޮލިފިކޭޝަން އޮތޯރިޓީ (އެމްކިޔުއޭ) ގެ ސީއީއޯގެ މަގާމު ވެސް ވަހީދު ފުރުއްވި އެވެ. އެއީ 2015-2018 އަށެވެ
ވަހީދު އޭއައިއޭގެ އެމްޑީއަކަށް ހަމަޖެއްސި އިރު، އެ ކުންފުނީގެ އެމްޑީގެ މަގާމުގައި އެންމެ ފަހުން ހުންނެވީ ގައިސް ނަސީރެވެ. އޭނަ މަގާމުން އިސްތިއުފާ ދެއްވީ ވެރިކަން ބަދަލުވުމާ ގުޅިގެން މިދިޔަ އަހަރުގެ ނޮވެމްބަރު މަހުގެ ތެރޭގަ އެވެ.
އޭއައިއޭގެ އެމްޑީޕީގެ މަގާމާ ވަހީދު ހަވާލުވެވަޑައިގެންނެވ އިރު، ގަން އެއާޕޯޓް ތަރައްގީ ކުރުމުގެ ބޮޑު މަޝްރޫއެއްގެ މަސައްކަތް ދަނީ ކުރިއަށެވެ. މިއީ ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން މިދިޔަ އަހަރުގެ ޖޫން 4 ގައި ފެށި މަޝްރޫއެކެވެ.
އަންނަ އަހަރު ނިންމަން އަމާޒު ހިފާފައިވާ އެ މަޝްރޫއުގެ ކޮންޓްރެކްޓަރަކީ އިންޑިއާގެ ރެނާޓަސް ކުންފުންޏެވެ.