އައްޑޫ ހިތަދޫ މެޖިސްޓްރޭޓް ކޯޓްގެ މެޖިސްޓްރޭޓް ކޯޓަކަށް ނަހުޝާ ރަޝީދު އައްޔަން ކުރަން ނިންމައިފި އެވެ.
ޖުޑިޝަލް ސާވިސް ކޮމިޝަން ޖޭއެސްސީ) އިން އޭނަ އެ މަގާމަށް އައްޔަންކުރަން ނިންމި އިރު ހުންނެވީ ފޭދޫ މެޖިސްޓްރޭޓް ކޯޓްގެ ލީގަލް އޮފިސަރުގެ މަގާމުގަ އެވެ.
ހިތަދޫ، ދުބުހިމާގޭ އަލްއުސްތާޒާ ނަހުޝާ ރަޝީދަކީ ގައުމީ ޔުނިވަސިޓީއން ބެޗްލާސް އޮފް ޝަރީއާ އެންޑް ލޯ ޙާސިލްކުރައްވާފައެިބާ ބޭފުޅެކެވެ. އަދި އޭނަ އަކީ ޝަރުއީ ދާއިރާ އިން ފަސް އަހަރުގެ ތަޖުރިބާ ހުންނެވި ބޭފުޅެކެވެ.
ހިތަދޫ މެޖިސްޓްރޭޓް ކޯޓްގެ އިތުރުން އިތުރު ހަ ރަށެއްގެ މެޖިސްޓްރޭޓް ކޯޓަށް ވެސް މެޖިސްޓްރޭޓުން އައްޔަންކުރަން ޖޭއެސްސީން ނިންމާފައިވެ އެވެ.
ޖޭއެސްސީން ރޭ ބުނީ މެޖިސްޓްރޭޓް ކޯޓުތަކަށް ފަނޑިޔާރުން ހޯދަން ކޮމިޝަނުން ކުރި އިޢުލާނުގެ ދަށުން "ފަނޑިޔާރުން ޢައްޔަންކުރުމުގައި ކޮމިޝަނަށް ލަފާދޭ ކޮމިޓީ" އިން އިންޓަވިއު ކުރުމަށް ފަހު ފަނޑިޔާރުކަމަށް ޢައްޔަންކުރުމަށް ކޮމިޝަނަށް ލަފާ އަރުވާފައިވާ ފަރާތްތަކުގެ ތެރެއިން ހަތް ބޭފުޅަކު ފަނޑިޔާރުކަމަށް ޢައްޔަންކުރުމަށް މިދޮޔަ ބުދަ ދުވަހު ބޭއްވި ކޮމިޝަންގެ 14 ވަނަ ބައްދަލުވުމުގައި ނިންމާފައިވާ ކަމަށެވެ.