އަންހެން ވިޔަފާވެރިން ކުރިއަރުވަން އެހީވުމުގެ މާލީ އެހީތެރިކަން ފޯރުކޮށް ދޭން އެސްޑީއެފްސީ އާއި އިކޮނޮމިކް މިނިސްޓްރީ ގުޅިގެން "ފަށާ މަދަދު" އާއި "ފަށާ މަދަދު ލީސިން" ގެ ނަމުގައި ލޯން ސްކީމެއް ރޭ ތައާރަފުކޮށްފި އެވެ.
މި ސްކީމަށް ރައީސް ޑރ. މުހައްމަދު މުއިއްޒުގެ "ހަފުތާ 14" ގައި ހިމެނޭ މި ވައުދުގެ ތެރެއިން 100 މިލިއަން ރުފިޔާ ކަނޑައަޅާފައިވެ އެވެ.
* ފަށާ މަދަދު ލޯނު
މި ސްކީމުން ފައިނޭންސްކޮށް ދޭން ހަމަޖެހިފައި ވަނީ އަންހެން ވިޔަފާރިވެރިންގެ ތެރެއިން އާމްދަނީ ކަށަވަރު ނުވުމުގެ ސަބަބުން ކޮންވެންޝަނަލް ބޭންކުތަކުން ހިދުމަތް ލިބި ދިނުމުގައި ދިމާވާ ދަތިތައް ހުރި މީހުންނަށެވެ.
މި ސްކީލް ދަށުން 6 ޕަސެންޓު އިންޓްރެސްޓަކާއެކު އަލަށް ވިޔަފާރި ފަށާ ފަރާތްތަކަށް 100،000-500،000ރ. އާ ދެމެދުގެ އަދަދަކަށް ލޯނު ދިނުމަށް ހަމަޖެހިފައިވެ އެވެ.
ލޯނު އަނބުރާ ދެއްކުމުގެ މުއްދަތަކީ 7 އަހަރެވެ.
* ފަށާ މަދަދު-ލީސިން
މި ސްކީމަކީ އަންހެނުންގެ ތެރެއިން އަމިއްލަ މަސައްކަތް ކުރާ މީހުންނާއި، ފްރީލާންސުކޮށް އަދި ގޭގައި މަސައްކަތްކުރާ މީހުންނަށް ހާއްސަކޮށްގެން، އެ މީހުންގެ ވިޔަފާރިތައް ކުރިއެރުވުމަށް ބޭނުންވާ ހަރުމުދާ ގަތުމަށް ހަމަޖައްސައިދޭ ފަސޭހަ ސްކީމެކެވެ.
އެގޮތުން 8 ޕަސެންޓު އިންޓްރެސްޓަކާއެކު 10،000ރ. ރުފިޔާއިން ފެށިގެން 100،000ރ. އާ ދެމެދުގެ އަދަދަކަށް މި ސްކީމުން ހަރުމުދާ ގަނެވޭނެ އެވެ.
ފަށާ މަދަދު ސްކީމުގެ ދަށުން ވަކި ފަރުދަކަށް ފައިނޭންސް ކުރެވޭ އަދަދު ކަނޑައަޅާނީ އެ ފަރާތެއްގެ ބޭންކު އެކައުންޓުން ކަށަވަރު ކުރެވޭ އާމްދަނީއަށް ބެލުމަށް ފަހުއެވެ.
އެސްޑީއެފްސީން ބުނީ "ފަށާ މަދަދު ލޯން" ސްކީމަށް އެދި ހުށަހެޅުމުގެ ފުރުސަތު އަންނަ މަހުގެ 3 ގައި ހުޅުވައިލާނެ ކަމަށެވެ. އަދި "ފަށާ މަދަދު ލީސިން" އަށް ވެސް މާޗްގެ ތެރޭގައި ހުޅުވައިލާނެ އެވެ. އެކަމަކު އަދި ވަކި ތާރީހެއް ނުނިމްމަ އެވެ.