ރާއްޖޭގައި އުފައްދަން ނިންމާފައިވާ ޑިވެލޮޕްމަންޓް ބޭންކް، މި އަހަރުގެ ތެރޭގައި އުފައްދައި އެތަނުގެ ހިދުމަތް ފަށާނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
މިނިސްޓަރު އެކަން ހާމަކުރެއްވީ އެސްޑީއެފްސީގެ "ފަށާ މަދަދު" ލޯނާއި "ފަށާ މަދަދު ލީޒިން" ފެށުމަށް ރޭ ބޭއްވި ރަސްމިއްޔާތުގަ އެވެ. ސައީދު ވިދާޅުވީ ރާއްޖޭގައި ހިންގާ މަޝްރޫއުތަކަށް ބޭނުންވާ ފަންޑުން ފަހިކޮށް ދިނުމުގެ ގޮތުން އުފައްދާ ޑިވެލޮޕްމެންޓް ބޭންކާ ގުޅޭ މަސައްކަތްތައް މިހާރު ކުރިއަށްދާ ކަމަށެވެ.
މިނިސްޓަރު ވިދާޅުވި ގޮތުގައި މިހާތު ކުރިއަށް ދަނީ އެ ބޭންކް ވުޖޫދަށް ގެނަނަން ބޭނުންވާ ގަވައިދުތައް އެކުލަވައިލުމުގެ މަސައްކަތްތެވެ. މި ބޭންކުން ރާއްޖޭގެ ވިޔަފާރިތަކާއި އިންވެސްޓަރުންނާއި ބޭރުގެ އިންވެސްޓަރުންނަށް ވެސް ބައިވެރިވުމުގެ ލިބޭނެ ކަމަށާއި މީގެ ސަބަބުން މަޝްރޫއުތައް ހިންގަން ބޭނުންވާ ފަންޑް ކުޑަ އިންޓްރެސްޓް ރޭޓެއްގައި އިންވެސްޓަރުންނަށް ލިބޭނެ ކަމަށެވެ.
ޑިވެލޮޕްމެންޓް ބޭންކެއް އުފެއްދުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. މިދިޔަ މަހުގެ ތެރޭގައި ވަނީ ޑިވެލޮޕްމަންޓް ބޭންކެއް ގާއިމުކުރުމަށް ބޭނުންވާ ގާނޫނާއި ގަވައިދުތައް އެކުލަވައިލުމަށް ހާއްސަ އޮތޯރިޓީއެއް ވެސް އުފައްދައިފަ އެވެ.
މި ބޭންކް ވާނީ ރާއްޖޭގައި އުފައްފާ ފުރަތަމަ ޑިވެލޮޕްމަންޓް ބޭންކަށެވެ.