ކުރިއަށް އޮތް ރޯދަ މަހު އއ. ތޮއްޑޫ ސްކޫލްގެ ދަރިވަރުން ބާޒާރަށް ކަރާ ނެރޭނެ ކަމަށް ބުނެފި އެވެ.
ރާއްޖޭގައި ކަރާ ހެއްދުމަށް މަޝްހޫރު ރަށުގެ ސްކޫލްގެ ތިމާވެށީ ކުލަބު، ގްރީންވޭވް އިން ރޯދަ އަށް ހާއްސަކޮށްގެން ކަރާގެ އިތުރުން ކިއުކަމްބާ ވެސް އަންނަނީ ހައްދަމުންނެވެ. މިކަމަށް ތޮއްޑޫ ސްކޫލްގެ ގޯތި ތެރޭގައި ހާއްސަ ސަރަހައްދެއް ކަނޑައަޅައި ކަރަ އާއި ކިއުކަމްބާ ހައްދަމުން އަންނަ އިރު، އަމާޒަކަށްވެފައި އޮތީ ރޯދަ މަހުގެ ތެރޭގައި މަދުވެގެން 200 ކިލޯގެ ކަރަ އާއި 30 ކިލޯގެ ކިއުކަމްބާ ބާޒާރަށް ނެރުމެވެ.
ތޮއްޑޫ ސްކޫލުން ބުނީ އެ ސްކޫލްގެ ދަރިވަރުންތަކެއް މުޅިން އަލަށް މިފަދަ މަސައްކަތެއް ފެށީ ތޮއްޑު އަކީ ކަރާ ހެއްދުމާ އެކީ ދަނޑުވެރިކަން ވަރަށް ފުޅާކޮށް ކުރަމުން އަންނަ ރަށަކަށްވާތީ ކަމަށެވެ. ދަރިވަރުން ފެށި މި މަސައްކަތާ ހެދީ ތޮއްޑޫ ސްކޫލްގެ ކީ ސްޓޭޖް ދަރިވަރުން ވެސް އަންނަނީ މި މަސައްކަތް ކުރާ ގޮތް ބަލައި ތަޖުރިބާ ހޯދަމުންނެވެ.
ތޮއްޑޫ ސްކޫލަކީ ގްރޭޑް 12 އާ ހަމައަށް ކިޔަވައި ދެމުން އަންނަ އަދި 400 އަށް ވުރެ ގިނަ ދަރިވަރުން ތިބި ސްކޫލެކެވެ.
ތޮއްޑޫ ސްކޫލްގެ ދަރިވަރުން އަމަލީ ގޮތުން ދަނޑުވެރިކަން ތަޖުރިބާ ކުރަމުން އަންނަ އިރު، އެ ސްކޫލުން ބުނީ މި މަސައްކަތުގެ ސަބަބުން ދަރިވަރުންނަށް ވަރަށް ބޮޑު އުފަލަކާއި ހިތްހަމަޖެހިމެއް ލިބިފައިވާ ކަމަށެވެ.
ތޮއްޑު އަކީ ރޯދަ މަހަށް ކަރާ ހެއްދުމަށް މުޅި ރާއްޖެ އެންމެ މަޝްހޫރު ރަށެވެ.