މިދިޔަ ބުރާސްފަތި ދުވަހު ލޯންޗްކުރި އައްޑޫ އައްސޭރި ޓޫރިޒަމް ޕްލޭނަކީ ބޮޑު ޖޯކެއް ކަމަށް ވިދާޅުވީ ހިތަދޫ ރަސްގެދަރި ދާއިރާގެ ކައުންސިލަރު ހުސައިން ޒަރީރު އެއަށް ފާޑު ވިދާޅުވެއްޖެ އެވެ.
ޓޫރިޒަމް މިނިސްޓަރު އިބްރާހީމް ފައިސަލް އައްޑު އަށް ވަޑައިގެން އައްޑޫ ސިޓީ ކައުންސިލްގައި ލޯންޗްކުރެއްވި ޕްލޭނަށް ފާޑު ވިދާޅުވެ، ޒަރީރު ސޯޝަލް މީޑިއާ ޕޯސްޓެއްގައި ވިދާޅުވީ ސަރުކާރުން އައްޑޫގެ ތަރައްގީ އަށް ކުރާ ކަންކަމަށް އޭނަގެ ފުރިހަމަ އެއްބާރުލުން އޮންނާނެ ކަމަށެވެ. އެކަމަކު އައްސޭރި ޓޫރިޒަމް ޕްލޭނަކީ ޖޯކެއް ކަމަށް ވިދާޅުވި އެވެ.
Sarukaarun Addu ge tharaggee ah kuraa kankamuga alhugandu ge furihama ebbarulun libeyne.. But a Joke is a Joke..! Asseyri Tourism Plan akee inthikhaabah thayyaaru koffaivaa 15 page ge LKG Crayon fotheh.. Evves dhiraasaa thakeh hedhi Stakeholder consultancy eh hedhifa nuvey..
— Hussain Zareer (@HussainZareer14) February 23, 2024
"އައްސޭރި ޓޫރިޒަމް ޕްލޭނަކީ އިންތިހާބަށް [މަޖިލިސް އިންތިހާބަށް] ތައްޔާރުކޮށްފައިވާ 15 ޕޭޖްގެ އެލްކޭޖީ ކްރެޔަން ފޮތެއް،" އައްޑޫގެ ޓޫރިޒަމާ ގުޅުން ހުރި ކަންކަމުގައި ކައުންސިލްގެ ފަރާތުން އެންމެ އިސްކޮށް އުޅުއްވާ ޒަރީރު ވިދާޅުވި އެވެ. "[މިއަށް] އެއްވެސް ދިރާސާތަކެއް ހެދި ސްޓޭކްހޯލްޑާ ކޮންސަލްޓެންސީއެއް ހެދިފައެެއް ނުވޭ."
އައްޑޫ އައްސޭރި ޓޫރިޒަމް މާސްޓަޕްލޭން ފަސް އަހަރަށް އެކުލަވާ އިރު، އެ މަސައްކަތް ސަރުކާރުން ކުރީ ޑރ. ސިމާދު ސައީދުގެ ސީޑީ ކޮންސަލްޓަންސީއާ ހަވާލުކޮށްގެންނެވެ.
ޓޫރިޒަމް މިނިސްޓްރީން ބުނީ ފަސް އަހަރުގެ އައްސޭރި ޓޫރިޒަމް ޑިވެލޮޕްމެންޓް ޕްލޭނުގެ ދަށުން އައްޑޫގައި ޓޫރިޒަމްގެ 6،000 އެނދު ގާއިމުކުރެވި 10،000 ވަޒީފާގެ ފުރުސަތު ފަހިވެގެން ދާނެ ކަމަށެވެ. މި ޕްލޭނުގެ ދަށުން އައްޑޫގައި ކަލްޗަރަލް ވިލެޖަކާއި ހޮސްޕިޓާލިޓީ ސްކޫލެއް ވެސް ގާއިމުކުރަން ނިންމާފައިވެ އެވެ.
މިނިސްޓްރީން ބުނީތދަ މި ޕްލޭނުގައިވާ ކަންކަން ފުރިހަމަ ވުމުން އައްޑޫ ޓޫރިޒަމް ހަބަކަށް ބަދަލުވެ، އައްޑޫ އަށް ކުރިއެރުމާއި ފުރުސަތުތައް ހުޅުވިގެންދާނެ ކަމަށް މިނިސްޓްރީން ބުނެ އެވެ.