ސަރުކާރުގެ މަސް ކުންފުނި، މިފްކޯގައި ހުރި މައްސަލަތައް ހައްލުކޮށް މަސްވެރިކަމުގެ ސިނާއަތް ހަރުދަނާކުރުމަށްޓަކައި އެ ކުންފުނި މިހާރު ރީސްޓްރަކްޗަކުރުމުގެ މަސައްކަތް ކުރަމުން އަންނަ ކަމަށް ފިޝަރީޒް މިނިސްޓަރު އަހުމަދު ޝިޔާމު ވިދާޅުވެއްޖެ އެވެ.
ރައީސް ޑރ. މުހައްމަދު މުއިއްޒު އިއްޔެ ބޮޑުތިލަދުންމައްޗަށް ފެއްޓެވި ދަތުރުގެ ތެރެއިން ހއ. އިހަވަންދޫގައ ބޭއްވި ޖަލްސާގައި މިނިސްޓަރު ވިދާޅުވީ އަމާޒަކީ ރާއްޖޭގެ މަސްވެރިކަމުގެ ސިނާއަތަކީ ބޭރުގެ އިންވެސްޓަރުން ޝައުގުވެރިވާ ސިނާއަތަކަށް ހެދުން ކަމަށެވެ.
އެގޮތުން އެކަމަށްޓަކައި މިފްކޯ މިހާރަށް ވުރެ ހަރުދަނާކުރަން ޖެހޭ ކަމަށް ވިދާޅުވި އެވެ.
"ކުރިއަށް މިއޮތް ފަސް އަހަރު ނިމިގެންދާ އިރު އަޅުގަނޑުމެން މިފްކޯ އަށް ދިމާވެފައިވާ މައްސަލަތައް ޙައްލުކުރާނަން،" ޝިޔާމު ވިދާޅުވި އެވެ. "އެއީ ރާއްޖޭގައި އެންމެ ގިނައިން މަސްގަނެ މަސްބޭރުކުރާ ކުންފުނި. އެހެންކަމުން މިފްކޯ ރީސްޓްރަކްޗަރކޮށްނިމޭ އިރު ބޭރުގެ އިންސްވެޓަރުން މަސްވެރިކަމުގެ ސިނާޢަތަށް އިންވެސްޓްކުރާނެ."