ކުރީފެ ސަރުކާރުން ފެށި "ބިންވެރިޔާ" ސްކީމުގެ ދަށުން މިހާރު 8،000 އަށް ވުރެ ގިނަ މީހުންނަށް ގޯތި ހަވާލުކޮށްފައިވާ ކަމަށް ހައުސިން މިނިސްޓްރީން ބުނެފިއެވެ.
އެ މިނިސްޓްރީން ނެރުނު ބަޔާނެއްގައި ބުނީ މިހާތަނަށް 8،250 މީހުންނަށް އެގްރީމެންޓުގައި ސޮއިކޮށް، މިހާރު ރަޖިސްޓަރީ ވެސް ހަވާލުކުރެވިފައިވާ ކަމަށެވެ. އަދި ބިން ލިބިފައިވާކަމުގެ ލިޔުން 118 މީހުންނަށް ހަވާލުކުރެވިފައިވާ ކަމަށް ވެސް އެ މިނިސްޓްރީން ބުންޏެވެ.
މިނިސްޓްރީން ބުނީ ބިން ހަވާލުނުކުރާ 303 މީހަކު އެބަތިބި ކަމަށާއިދި އެޕްލިކަންޓުން ބިން ދޫކުރަން އެދިފައިވާތީ ސޮއި ނުކުރެވިހުރި 16 މީހަކާއި، އެޕްލިކަންޓު ނިޔާވުމުގެ ސަބަބުން ސޮއިނުކުރެވި 12 މީހަކު ވެސް އެބަތިބި ކަމަށެވެ.
ހައުސިން މިނިސްޓްރީން ބުނީ އިތުރަށް ބަލަން ޖެހޭ ކަންކަން ހުރުމުގެ ސަބަބުން 120 ފޯމެއްގައި އަދި ސޮއި ނުކުރެވި އޮތް ކަމަށެވެ. އެކަމަކު މިހާރު 212 އެގްރީމަންޓެއްގައި ސޮއިކޮށް ރަޖިސްޓްރީ ހަވާލު ކުރުމުގެ މަސައްކަތް ކުރިއަށްދާ ކަމަށް ވެސް އެ ބުންޏެވެ.
މިނިސްޓްރީން ބުނި ގޮތުގައި "ބިންވެރިޔާ" ސްކީމުގެ ދަށުން ބިންތަކުގެ އެގްރީމަންޓުގައި ސޮއިކޮށް ރަޖިސްޓްރީ ހަވާލުކުރުމުގެ އިތުރުން ގޯތި ލިބިފައިވާކަމުގެ ލިޔުން ހަވާލު ކުރެވިފައި ނުވާ މީހުންނަށް ގުޅުމުގެ މަސައްކަތް ކުރަމުން އަންނަ ކަމަށެވެ.
"ބިންވެރިޔާ" ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން އޮތީ ނިންމައިފައެވެ. މާލޭ މީހުންނަށް ހުޅުމާލެ އިންނާއި ގުޅިފަޅުންނާއި ގިރާވަރުފަޅުން ވެސް ގޯތި ދޭނެ އެވެ.