ވިލާ ކޮލެޖްގައި ޖިމެއް ހުޅުވައިފި

މުވައްޒަފުންނާއި ދަރިވަރުން ވެސް ބޭނުން ކުރެވޭ ގޮތަށް ވިލާ ކޮލެޖްގައި ޖިމެއް ހުޅުވައިފި އެވެ.

އިއްޔެ އެ ޖިމް ހުޅުއްވައި ދެއްވީ ކޮމިޝަނަ އޮފް ސްޕޯޓް މުހައްމަދު ތޮލާލެވެ. އެ ރަސްމިއްޔާތުގައި އޭނަ ވިދާޅުވީ ހުރިހާ އުމުރެއްގައި ވެސް ކަސްރަތުކޮށް ދުޅަހެޔޮ ތިބުމުގެ މުހިންމު ކަމަށާއި މިއަދުގެ ދުނިޔޭގައި ފިޓްނަސް އަށް އިސްކަންދިނުމަކީ ވަގުތު ނެތުމުގެ ސަބަބުން އުނދަގޫ ކަމަކަށް ވެފައިވާ ކަމަށެވެ.

ނަމަވެސް ކިޔަވާ ކެމްޕަހުގެ ތެރޭގައި ފިޓްނަސް ސެންޓަރެއް ހުރުމަކީ ދަރިވަރުންނާއި މުވައްޒަފުންނަށް ލިބުނު ވަރަށް ބޮޑު ނަސީބެ ކަމަށާއި ވިލާ ކޮލެޖުން މި ފަހިކޮށް ދިނީ ވަރަށް ވެސް ބޭނުންތެރި ފުރުސަތެއް ކަމަށް ވިދާޅުވި އެވެ.

ވިލާ ކޮލެޖުން ބުނީ އެތަނުގައި ހުޅުވި ހޮނިހިރު ދުވަހުން ފެށިގެން ބުރާސްފަތި ދުވަހަށް ފަތިހު 5:00 އިން ރޭގަނޑު 11:00 އަށް ހުޅުވާފައި ހުންނާނެ ކަމަށެވެ. އަދި ހުކުރު ދުވަހު ފަތިހު 5:00-10:00 އަށް އަދި ހަވީރު 4:00 އިން ރޭގަނޑު 11:00 އަށް ޖިމްގެ ބޭނުން ކުރެވޭނެ އެވެ.

އެތަނުން ބުނީ މި ޖިމްގެ ސަބަބުން ފިޓްނަސް ރޫޓިންތަކުގައި ބައިވެރިވެ، ދަރިވަރުންނާއި މުވައްޒަފުން ދުޅަހެޔޮކަމަށް އިސްކަން ދިނުމަށް ޖާގަ ލިބިގެން ދާނެ ކަމަށެވެ.

މިދިޔަ ޑިސެމްބަރު މަހުގެ ތެރޭގައި ވިލާ ކޮލެޖްގައި "ވީ ކެއާ ކައުންސެލިން އެންޑް ސައިކޮތެރަޕީ ސެންޓާ" ނަފުސާނީ ފަރުވާދޭ ސެންޓަރެއް ވެސް ހުޅުވާފައިވެ އެވެ.