ހުޅުމާލޭގައި މިއަދު ހިނގި އެކްސިޑެންޓެއްގައި ދެ ވެހިކަލަކަށް ބޮޑެތި ގެއްލުންތަކެއްވެއްޖެ އެވެ.
ހުޅުމާލޭ ނިރޮޅު މަގުގައި މި ހާދިސާ ހިނގާފައި ވަނީ ވޭނެއް ކާރެއްގައި ޖެހިގެންނެވެ.
އެނގިފައިވާ ގޮތުގައި އެކްސިޑެންޓް ހިނގީ ވޭން ދުއްވި ޑްރައިވަރަށް ނިދިޖެހި، ކޮންޓްރޯލް ގެއްލި، ވޭނުގެ ކުރީގައި އޮވެގެން ދުއްވަމުން ދިޔަ ޓެކްސީގައި ޖެހި އެ ކާރު މަގުގެ އެއް ފަރާތުގައި އޮތް ކާރެއްގައި ޖެހިގެންނެވެ. މި ހާދިސާގައި ޓެކްސީ ފަހަތަށާއި ކުރީކޮޅަށް ވަރަށް ބޮޑެތި ގެއްލުންތަކެއްވެފައިވާ އިރު، ކާރު ޖެހުނު ޕާކްފައި އޮތް ކާރުގެ ފަހަތަށް ވެސް އެކި ވަރުގެ ގެއްލުންވެފައިވެ އެވެ.
މި ހާދިސާގައި ވޭނުގެ ކުރީކޮޅު ވެސް ވަރަށް ބޮޑަށް ހަލާކުވެފައިވެ އެވެ. އަދި ވޭނާއި ކާރު ޑްރައިވަރަށް ވެސް ކުދިކުދި އަނިޔާތައްވި އެވެ.
މި ހާދިސާ ފުލުހުން އަންނަނީ އިތުރަށް ތަހުގީގު ކުރަމުން އަންނަ އިރު، ފުލުހުންނަށް ބުނީ ހާދިސާގެ މައުލޫމާތު ލިބުނީ ހެނދުނު 6:20 އެހާކަށްހާ އިރު ކަމަށެވެ.
ހުޅުމާލެ އަކީ ފަހަކަށް އައިސް އެކްސިޑެންޓްތައް ވަރަށް ގިނައިން ހިނގަމުންދާ ތަނެކެވެ. މިފަދަ ނުރައްކާތެރި ބައެއް ހާދިސާތަކުގައި ބައެއް މީހުންގެ ފުރާނަ ވެސް ގެއްލިފައިވެ އެވެ.