ތިމާވެށީގެ ދާއިރާއިން ކިޔަވަން އެންވަޔަރަމަންޓް މިނިސްޓްރީ އާއި ގައުމީ ޔުނިވާސިޓީ ގުޅިގެންދޭ "އެންދެރި ސްކޮލަޝިޕް" ގެ އެއްބަސްވުމުގައި ސޮއިކޮށްފި އެވެ.
އިއްޔެ އެ އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ ޑިރެކްޓަ ޖެނެރަލް މުހައްމަދު ޒާހިރެވެ. ޔުނިވަސިޓީގެ ފަރާތުން ސޮއި ކުރެއްވީ ފެކަލްޓީ އޮފް އިންޖިނިއަރިން ސައިންސް އެންޑް ޓެކްނޮލޮޖީގެ ޑީން އާދަމް ޚާލިދެވެ.
އެންވަޔަރަމަންޓް މެނޭޖްމަންޓް ދާއިރާ އިން އެއް އަހަރު ދުވަހުގެ މުއްދަތަށް ކުރިއަށް ގެންދާ، ސެޓްފިކެޓް ލެވެލް 3 ގެ ކޯސް ކުރިއަށް ގެންދަން ހަމަޖެހިފައި ވަނީ ލ. ގަމުގައި ހުންނަ އެމްއެންޔޫގެ ކެމްޕަހުގަ އެވެ.
"އެންދެރި ސްކޮލަޝިޕް" އަށް ކުރިމަތިލާން މިދިޔަ މަހުގެ ތެރޭގައި ހުޅުވައިލުމުން މިހާތަނަށް 18 ދަރިވަރަކު ކުރިމަތިލާފައިވާ އިރު، އޭގެ ތެރެއިން 15 ދަރިވަރުންނަށް ސްކޮލަޝިޕް ހަމަޖައްސައި ދޭނެ ކަމަށް އެންވަޔަރަމަންޓް މިނިސްޓްރީން ބުންޏެވެ.
މި ކޯސް ކުރިއަށް ގެންދަނީ ކުދިން ދަރިވަރުން ރަށުގައި ތިބެގެން ކިޔެވުމުގެ ފުރުސަތު ލިބޭގޮތަށް ބްލެންޑެޑް މޯޑަށެވެ. އަދި ކޮންމެ ސެމިސްޓާއަކު ތިން ބްލޮކަށް ކުދިންނާއި ލެކްޗަރާއިންނާ ދިމާވާނެ ކަމަށް ޔުނިވަސިޓީން ބުންޏެވެ.