ށ. މިލަންދޫގައި ވެސް އެއާޕޯޓެއް އަޅާނެކަމުގެ ޔަގިންކަން ރައީސް ޑރ. މުހައްމަދު މުއިއްޒު ދެއްވައިފި އެވެ.
އެ މަނިކުފާނު އެ ޔަގީންކަން ދެއްވީ ބޮޑުތިލަދުންމައްޗަށް ކުރައްވަމުން ގެންދަވާ ދަތުރުގެ ތެރެއިން މިއަދު މިލަންދޫ ރައްޔިތުންނާ ބައްދަލުކުރައްވަ އެވެ.
ރައީސް ވިދާޅުވީ އެ ރަށުގައި އެއާޕޯޓެއް އެޅުމުގެ އިތުރަށް ވަޢުދުވެވަޑައިގެންނެވި ހުރިހާ ކަމެއް ފުރިހަމަކޮށްދެއްވާނެ ކަމަށެވެ. އެގޮތުން މިލަންދޫގައި އިސްލާމީ މަރުކަޒެއް އެޅުމުގެ މަސައްކަތް އިސްލާމިކް މިނިސްޓްރީން ކުރިއަށް ގެންދަވާ ކަމަށާއި އަދި މަގުތައް ހެދުމާއި ހޮސްޕިޓަލްގެ މަސައްކަތާއި، އިންޑޯ/އައުޓްޑޯ ކުޅިވަރު ކުޅޭ ކޮމްޕްލެކްސް ހެދުމާއި، ބޯހިޔާވަހިކަމުގެ ދާއިރާއިން ހުރި ވަޢުދުތައް ހިމެނޭހެން ހުރިހާ ވަޢުދުތައް ފުއްދަވާނެކަމުގެ ޔަގީންކަން ދެއްވާ ކަމަށް ވިދާޅުވި އެވެ.
އެހެންވެ މި ހުރިހާ ކަމެއް ބާރު ސްޕީޑުގައި ކުރިއަށްގެން ދިއުމަށް މަގު ފަހިކޮށް ދެއްވުމަށް ރައްޔިތުންގެ އެއްބާރުލެއްވުމަށް އެދިވަޑައިގަތެވެ.