ކުރިއަށް އޮތް ރޯދަ މަހަށް ހާއްސަކޮށްގެން ފުވައްމުލަކުގައި ދިވެހި އުފެއްދުންތަކަށް ހާއްސަ "ރޯދަ ބާޒާރު" އެއް ބާއްވަން ނިންމައފި އެވެ.
ފުވައްމުލަކު ސިޓީ ކައުންސިލުން ބުނީ އެ ސިޓީގައި ތަރުކާރީ އާއި މޭވާގެ ބާވަތްތައް ހައްދާ މީހުންނަށް ބާޒާރުގައި ބައިވެރިވުމުގެ ފުރުސަތު މާދަމާ މެންދުރު 12:00 އާ ހަމައަށް ހުޅުވާލާފައިވާ ކަމަށެވެ.
ރާއްޖޭގެ އެންމެ ދެކުނުން ދަނޑުވެރިކަމުގެ މަސައްކަތް ފުޅާކޮށް ކުރަމުން އަންނަ ފުވައްމުލަކުގައި ރޯދަ މަހަށް ހާއްސަކޮށްގެން ދިވެހި އުފެއްދުންތައް ވިއްކަން ހާއްސަ "ރޯދަ ބާޒާރު" އެއް ބޭއްވުމުގެ މައިގަނޑު ބޭނުމަކީ ރަށުގެ ދަނޑުބިންތަކާއި އަމިއްލަ މީސްމީހުންގެ ގޭގޭގައި ހައްދާ ތަރުކާރީ އާއި މޭވާގެ ބާވަތްތައް އެއް ތަނަކުން ފަސޭހަކޮށް ވިއްކައި ގަތުމުގެ ފުރުސަތު ފަހިކޮށް ދިނުން ކަމަށް ކައުންސިލުން ބުންޏެވެ.
ކަލަންޑަރުގައިވާ ގޮތުން މި އަހަރުގެ ރޯދަ މަހުގެ ފުރަތަމަ ދުވަހަކީ އަންނަ މަހުގެ 11 އެވެ.