ރާއްޖޭގެ އާބާދީ އިތުރު ކުރަން ޖެހޭ ކަމަށާއި އެހެން ނޫން ކަމަށްވާ ނަމަ ގައުމީ ތަރައްގީ އަށް ވަރަށް ބޮޑަށް ހުރަހަކަށް ވާނެ ކަމަށް ފަސްޓްލޭޑީ ސާޖިދާ މުހައްމަދު ވިދާޅުވެއްޖެ އެވެ.
ރާއްޖޭގެ މިހާރުގެ އާބާދީގެ ހާލަތާ ގުޅޭ އިއްޔެ ބޭއްވި "ޗޭންޖިން ޕޮޕިއުލޭޝަން ޑައިނަމިކްސްއިން މޯލްޑިވްސް" ޝަރަފްވެރިކޮށް ދެއްވައި ސާޖިދާ ވިދާޅުވީ ރާއްޖޭގައި އުފަންވާ ކުދިން މަދުވުމުގެ މައްސަލަ އަކީ ކަންބޮޑުވާ ކަމެއް ކަމަށާއި އަދި މިއީ މިކަމަށް ޙައްލެއް ގެންނަން މަސައްކަތް ކުރަން ޖެހޭ ވަގުތު ކަމަށެވެ.
އެ ކަމަނާ ވިދާޅުވީ ރާއްޖޭގައި އުފަންވާ ނިސްބަތް ދަށްވަމުންދާ މައްސަލައަށް ޙައްލު ގެނައުމަށް ހުރިހާ ފަރާތެއް ގުޅިގެން މަސައްކަތް ކުރަން ޖެހޭ ކަމަށެވެ. އެހެން ނޫން ނަމަ މީގެ 20 އަހަރު ފަހުން ރާއްޖޭގެ އިގުތިސާދީީ އިންޖީނު ހިންގުމަށް ވަޒީފާ އަދާކުރާނެ ވޯކް ފޯހެއް ނެތުމުގެ މައްސަލައާ ކުރިމަތިލާން ޖެހިދާނެ ކަމަށެވެ.
ސާޖިދާ ވިދާޅުވީ ފަހިވަމުން އަންނަ ފުރުސަތުތަކާ އެކީ ޢާއިލާއާ ދުރަށް ތަޢުލީމާއި ވަޒީފާ އާއި އެ ނޫން ވެސް ބޭނުންތަކުގައި ދުރު ހިސާބުތަކަށް މީހުން ބަދަލުވާ މަންޒަރު އެހެން ޤައުމުތަކެކޭ އެއްގޮތަށް ރާއްޖެއިން ވެސް ފެންނަމުންދާ ކަމަށެވެ.
"ރާއްޖޭގެ އާބާދީގެ ހަތްދިހަ ހަ މަސައްކަތްކުރާ އާބާދީ. މިއީ މިހާރު ވަރަށް ބޮޑު ކުރިއެރުމެއް ޤައުމީ ފެންވަރުގައި،" އެ ކަމަނާ ވިދާޅުވި އެވެ. "އެހެންނަމަވެސް އުފަންވާ ކުދިންގެ ރޭޓަށް ބަލާއިރު ރާއްޖޭގެ މަސައްކަތްކުރާ އާބާދީ ބޮޑުތަކުން ކުޑަވެ ޤައުމީ ތަރައްގީ އަށް އޭގެ ނޭދެވޭ އަސަރު ކުރާނެ. އެކަމަށް މިއަދު ލިބިފައިވާ ފުރުސަތުގައި ފިޔަވަޅު އަޅަން ޖެހޭ."