ދައުލަތުގެ މާލިއްޔާގެ ކަންކަން މިހާރު އޮތީ މިސްރާބުން ކައްސާލާފައި ކަމަށް މޯލްޑިވްސް އިންލެންޑް ރެވެނިއު އޮތޯރިޓީ މީރާ) ގެ ކުރީގެ ވެރިޔާ ފަތުހުﷲ ޖަމީލު ވިދާޅުވެއްޖެ އެވެ.
އެމްޑީޕީގެ މަޖިލިސް ކެމްޕޭން ރޭ ފެށުމަށް ބޭއްވި ޖަލްސާގައި ތިމަފުށީ ދާއިރާ އަށް ވާދަކުރައްވާ ފަތުހުﷲ ވިދާޅުވީ މާލިއްޔާ މިސްރާބުން ކައްސާލާފައިވާ ކަމަށް ދެބަސްވެވޭނެ އެއްވެސް ގޮތެއް މިހާރު ނެތް ކަމަށާއު އާންމު ދިރިއުޅުމުގައި ދެކެވޭ ހުރިހާ ވާހަކަތަކުން އެކަން ސާފުވާ ކަމަށެވެ.
މަޖިލީހަށް ވާދަކުރުމަށްޓަކައި ކޮމިޝަނާ ޖެނެރަލް އޮފް ޓެކްސޭޝަންގެ މަގާމުން ދުވަސްކޮޅެއް ކުރިން އިސްތިއުފާ ދެއްވި ފަތުހުﷲ ވިދާޅުވީ ރައީސް އިބްރާހީމް މުހައްމަދު ސޯލިހުގެ ވެރިކަމުގައި މާލިއްޔާ އަށް ގެއްލުންވި އެތައްކަމެއް ކުރިމަތިވި ކަމަށެވެ.
"އަޅުގަނޑުމެންގެ ސަރުކާރުން މި ވޭތުވެ ދިޔަ ފަސް އަހަރު ދުވަހުގެ ތެރޭގަ އަޅުގަނޑުމެންނަށް ކޮވިޑް 19ގެ އާލަމީ ވަބާއާ ކުރިމަތިވި. ރަޝިއާ، ދިވެހި ރާއްޖެއަށް އެންމެ ގިނަ ޓުއަރިސްޓުން އަންނަ އެއް ގައުމުގައި ބޮޑު ހަނގުރާމައެއްގެ ތެރެއަށް ދިޔަ،" އޭނަ ވިދާޅުވި އެވެ. "އަދި ހަމަ އެއާއެކު ތެލުގެ އަގު އިންތިހާއަށް ބޮޑުވެގެންދިޔަ. އެހުރިހާ ކަމަކާއި އެކުވެސް، ދައުލަތުގެ އެންމެ މުވައްޒިފެއްވެސް ވަޒީފާއިން ވަކިނުކޮށް ، އެއްމެ މުވައްޒިފެއްގެ ވެސް މުސާރަ ކުޑަނުކޮށް ކަންކަން ކުރިޔަށް ގެންދެވުން."
ފަތުހުﷲ ވިދާޅުވީ ރާއްޖޭގެ މިހާރުގެ ހާލަތަށް ބަލާ އިރު، ރިކޯޑް އަދަދަކަށް ޓޫރިސްޓުން އަންނަ ވާހަކަ ރެކޯޑް އަދަދަކަށް ދައުލަތަށް އާމްދަނީ ވަންނަމުން އަންނަ ވާހަކަ ވެސް ރައީސް ޑރ. މުހައްމަދު މުއިއްޒުގެ ސަރުކާރުން ދައްކަމުން އަންނަ ކަމަށެވެ.
"އެކަމަކު އަޑުއިވިގެން މިދަނީ ދައިލަތުން އާންމު ރައްޔިތުންނަށް ދޭންޖެހޭ ފައިސާ ނުދެވޭ ވާހަކަ. އެންމެ ކުޑަމިނުން މަސްވެރިންނަށް މަހުގެ އަގު އަދާނުކުރެވޭ ވާހަކަ،" އޭނަ ވިދާޅުވި އެވެ. "އެހެންވީމާ މި ފާހަގަ ކުރަނީ ދައުލަތުގެ މާލިއްޔާ ވަނީ މިސްރާބުން ކައްސާލާފައޭ. މާލިއްޔާ ހަމަ މަގަށް އަޅުވަން އެބަޖެހެއޭ."
ފަތުހުﷲ ފާހަގަ ކުރެއްވި ގޮތުގައި މި ވަގުތަކީ ދައުލަތުގެ ހަަރަދު ކުޑަ ކުރަން ޖެހޭ ވަގުތެއްކަން ވިސްނާލަން ޖެހޭ ކަމަށެވެ. ނަމަވެސް އެކަން ކުރަން ވާނީ އާންމު ރައްޔިތުންގެ ޒާރޫރީ ބޭނުންތަކަށާއި، ރައްޔިތުންގެ ދިރިއުޅުމުގެ ހާލަތު މިހާރަށް ވުރެ ދަށަށް ނުދާނެ ގޮތަކަށް އަދި އިންވެސްޓަރުންގެ އިތުބާރު ނުގެއްލޭނެ ގޮތަށް ކަމަށް ވިދާޅުވިއެވެ.
"މިހުރިހާ ކަމަކަށް ރިއާޔަތްކޮށްގެން ހަރަދު ކުޑަކުރުމުގެ ވާހަކަދައްކާއިރު، ސަރުކާރުން އެބަޖެހޭ ބަހާއި އަމަލާ ދިމާވާން. އަޅުގަނޑުމެންނަށް މިހާރު މި ފެންނަނީ ދައުލަތުގެ މަތީ ފަޑީގެ މަގާމުތަކަށް އެކި ނަން ނަމުގައި، މިނިސްޓަރުން، މިނިސްޓަރުން ފެންވަރުގެ ބޭފުޅުން، ސްޓޭޓް މިނިސްޓަރުން، ސްޓޭޓް މިނިސްޓަރުން ފެންވަރުގެ ބޭފުޅުން، ނައިބުން، ޕޮލިޓިކަލް ޑިރެކްޓަރުން، ސީނިއާ ޕޮލިޓިކަލް ޑިރެކްޓަރުން މިހެން ގޮސް އަދަދު ނުކުރެވޭ ވަރަށް." ފަތުހުﷲ ވިދާޅުވި އެވެ.
އޭނަ ވިދާޅުވި ގޮތުގައި ދައުލަތުގެ ހަރަދު ކުޑަކުރަން ވާނީ ނިޒާމެއްގެ ތެރެއިންނެވެ. އެގޮތުން. މިހާރުގެ ބަޖެޓުގައި ވެސް، ހަރަދު ކުޑަކުރަން އެމްޑީޕީގެ ފަރާތުުން ހުށައަޅާފައިވާ ކަންކަން ހިމެނިފައިވާނެ ކަމަށް ވިދާޅުވި އެވެ. އެކަންކަން ތަންފީޒުކޮށްފި ނަމަ ގައުމުގެ މަލިއްޔާ ރަނގަޅު މިސްރާބަކަށް ގެންދެވޭނެ ކަމަށް ވިދާޅުވި އެވެ.