ކަނޑުމަތީގެ ސަލާމަތާއި ރައްކާތެރިކަމަށް ރައްޔިތުން ހޭލުންތެރިކުރުވުމަށް މެރިން ޕޮލިހުން ފުވައްމުލަކުގައި ޕްރޮގްރާމެއް ފަށައިފި އެވެ.
އަންގާރަ ދުވަހު ފެށި ޕްރޮގްރާމްގައި ފުރަތަމަ މައުލޫމާތު ދީފައި ވަނީ ފުވައްމުލަކުގައި މަސައްކަތްކުރާ ފުލުހުންނަށާއި ރަށު ކައުންސިލުގެ މުވައްޒަފުންގެ އިތުރުން ރަށުގެ ކަމުވޮށިގެންވާ މީހުންނަށެވެ.
އެގޮތުން، ކަނޑުމަތީގެ ސަލާމަތާއި ރައްކާތެރިކަމާއި އެ ރައްކާތެރިކަން ހޯދުމަށް މަސައްކަތްކުރާނެ ގޮތާއި ކަނޑުމަތީގެ ހާދިސާތަކުގައި އަމަލުކުރާނެ ގޮތްތައް، ކަނޑު ދަތުރުފަތުރުގެ ގާނޫނާއި ގަވާއިދުތަކާއި އެ ގަވާއިދުތަކަށް އަމަލުކުރުމުގައި ހާއްސަ ސަމާލުކަން ދޭންޖެހޭ ކަންކަމުގެ މައުލޫމާތު ހިއްސާކޮށްފައިވެ އެވެ. އަދި ދަތުރަށް ފެށުމުގެ ކުރިން ސަމާލުކަން ދޭން ޖެހޭ ކަންކަމާއި ކަނޑު އުޅަނދަކުން ދަތުރުކުރާ އިރު އަމިއްލަ ފަރުދެއްގެ ހައިސިއްޔަތުން ސަމާލުކަން ދޭން ޖެހޭ ކަންކަމުގެ މައުލޫމާތު ވެސް ދީފައިވެ އެވެ.
މާދަމާގެ ނިޔަލަށް ކުރިއަށް ގެންދާ މި ޕްރޮގްރާމްގައި، ކަނޑު އުޅަނދުފަހަރު ދުއްވާ މީހުންނާއި އުޅަނދުފަހަރުގެ ވެރިންނާއި، ސްކޫލުތަކުގެ ޓީޗަރުންނާއި ދަރިވަރުންނާއި ބެލެނިވެރިންނަށް ވެސް މައުލޫމާތު ދޭނެ އެވެ.
މި ޕްރޮގްރާމަކީ ކަނޑުތަކަކީ އަމާން ރައްކާތެރި ތަނަކަށް ހެދުމާއި ކަނޑުމަތީގައި ދިމާވާ އެކްސިޑެންޓުތަކާއި ހާދިސާތަކުގައި މީހުންނާއި މުދަލަށް ލިބޭ ގެއްލުން ކުޑަކުރުމަށާއި ދިވެހިރާއްޖޭގެ ރައްޔިތުންނަކީ ރައްޔިތުންނަކީ ކަނޑު ދަތުރުފަތުރުގެ ގާނޫނާއި ގަވާއިދުތަކަށް ތަބާވާ އަދި ގާނޫނާއި ގަވާއިދުތަކަށް އަހުލުވެރި ބަޔަކަށް ހެދުމަށް ކުރިއަށް ގެންދާ ޕްރޮގްރާމެކެވެ.
މި ޕްރޮގްރާމްގައި މެރިން ޕޮލިހާ އެކީ، ޓްރާންސްޕޯޓް މިނިސްޓްރީގެ އިތުރުންދި އެލައިޑް އިންޝުއަރެންސުން ބައިވެރިވެ އެވެ.