ރައްޔިތުން މަޖިލިސް އިންތިހާބާ ދިމާކޮށް ރައީސް ޑރ. މުހައްމަދު މުއިއްޒު އަތޮޅު ތެރެއަށް ފެއްޓެވި ކެމްޕޭން ދަތުރަކީ ފެނަށްވި ދަތުރެއް ކަމަށް ވިދާޅުވެ، ކުރީގެ މިނިސްޓަރު މުހައްމަދު މަލީހު ޖަމާލު ފާޑު ޖޯކް ޖައްސަވަވައިފި އެވެ.
އޭނަ ސޯޝަލް މީޑިއާ ޕޯސްޓެއްގައ އެގޮތަށް ވިދާޅުވީ އަންނަ މަހުގެ 17 ގައި މަޖިލިސް އިންތިހާބު ބާއްވަން ސަރުކާރުން ބޭނުންވި ނަމަވެސް، ރޯދައިގެ ފަހުން އިންތިހާބު ބާއްވަން ރައްޔިތުންގެ މަޖިލިސް ދެވަނަ ފަހަރަށް އިއްޔެ ފާސްކުރުމާ ގުޅިގެންނެވެ. އިންތިހާބު ފަސްކުރާ ބިލް މަޖިލީހުން އަލުން ފާސްކުރީ، ކުރިން ފާސްކުރި ބިލު ރައީސް ތަސްދީގު ނުކުރައްވައި ފޮނުއްވުމާ ގުޅިގެންނެވެ.
އަދި އިއްޔެ ބިލު އަލުން ފާސްކުރީ އެއްވެސް ބަދަލެއް ވެސް ނެތި އެވެ. އޭގައިވާ ގޮތުން މަޖިލިސް އިންތިހާބު ރޯދައާ ދިމާވާތީ، އިންތިހާބު ބާއްވަން ޖެހޭތީ ރޯދަ މަސް ނިމޭތާ 10 ދުވަސް ފަހުންނެވެ. އިންތިހާބު ބާއްވަން އިލެކްޝަން ކޮމިޝަން (އީސީ) އިން އިއުލާންކޮށްފައި އޮތް ތާރީހަކީ އަންނަ މަހުގެ 17 އެވެ. އެއީ ރޯދަ މަހުގެ 7 ވަނަ ދުވަހެވެ. މި އަހަރުގެ ރޯދަ މަސް ފެށެނީ އަންނަ މަހުގެ 11 ގަ އެވެ.
އެހެންވެ އެކަމަށް އިޝާރާތްކުރައްވައި ކުރީގެ ރައީސް ޔާމީން އުފައްދަވަން މަސައްކަތްކުރައްވާ ޕީޕަލްސް ނެޝަނަލް ފްރޮންޓް (ޕީއެންއެފް) ގައި އިސްކޮށް އުޅުއްވާ މަލީހު ވިދާޅުވީ ރައްޔިތުންގެ މަޖިލިހުގެ އިންތިޚާބު އޮންނާނީ އެޕްރީލް މަހުގެ 20 ގެ ފަހުން ކަމަށެވެ.
"ތިޔަ ކުރެއްވި [ކެމްޕޭން] ދަތުރު ފެނަށް." އޭނަ ވިދާޅުވި އެވެ.
މަލީހު ވިދާޅުވީ ރައީސް މުއިއްޒުގެ ސްޕެޝަލް އެޑްވައިޒަރެއްގެ މަގާމުގައި ހުންނެވި އަބްދުއްރަހީމް އަބްދުﷲ އަދުރޭ) ގެ އެޑްވައިޒަރުކަމުގައި ދަށުގައި ކުރި ދަތުރުގައި ރައީސް އެރީ ފަރަށް ކަމަށެވެ.
"ލަސް ނުކޮށް އަދުރޭ އިސްތިއުފާ ދޭން ޖެހޭ، ނޫނީ ވަޒީފާއިން ވަކިކުރަން ޖެހޭ." އޭނަ ވިދާޅުވި އެވެ.