މިއަދު އެއާ އެމްބިއުލާންސްގެ ހިދުމަތް އިފުތިތާހު ކުރަން ތައްޔާރުވަމުން އަންނަ އިރު، އެކަމަށް ބޭނުންކުރާ ބޯޓްގެ ފޮޓޯއެއް ރައީސް ޑރ. މުހައްމަދު މުއިއްޒު އާންމު ކުރައްވައިފި އެވެ.
އެކްސްގައި އެ މަނިކުފާނު ރޭ ބޯޓްގެ ފޮޓޯއެއް ޕޯސްޓްކުރެއްވި ނަމަވެސް އެކަމާ ގުޅޭ ގޮތުން އެއްވެސް އެއްޗެއް ލިޔުއްވާފައެއް ނުވެ އެވެ.
އެެއާ އެމްބިއުލާންސްގެ ހިދުމަތަށް ބޭނުން ވަނީ މޯލްޑިވިއަންގެ ޑޭޝް-8 ގެ މަތިންދާބޯޓެވެ. އެގޮތުން އެއާ އެމްބިއުލާންސަކަށް ބޭނުންވާ ބަދަލުތައް ބޯޓަށް ގެނެސްފައިވެ އެވެ. އެގޮތުން ބަލިމީހުންނަށް ދޭން ޖެހޭ ޕެރަމެޑިކް ހުރިހާ ހިދުމަތްތަކެއް، ބަލިމީހާ ފަރުވާ އަށް ގެންދަން ޖެހޭ ތަނަށް ގެންދިއުމާ ހަމައަށް ބޯޓްގައި ދެވޭނެ އެވެ.
— Dr Mohamed Muizzu (@MMuizzu) February 29, 2024
އިއްޔެ ހެލްތު މިނިސްޓްރީން ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޑރ. އަބްދުﷲ ހަލީލު ވިދާޅުވީ އެއާ އެމްބިއުލާންސްގައި އެއް ފަހަރާ ދެ މީހުން އުފުލޭނެ ކަމަށެވެ. ސްރީ ލަންކާ އަށް އެއާ އެމްބިއުލާންސްގައި ބަލި މީހުން ގެންދިއުމުގެ ހުއްދަ ލިބިފައިވާ އިރު، ވަރަށް އަވަހަށް އިންޑިއާ އިން ވެސް ހުއްދަ ލިބޭނެކަމުގެ އުންމީދު އޮތް ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ އެއާ އެމްބިއުލާންސްގެ ހިދުމަތް ފަށާ އިރު، 15 މުވައްޒަފަކު ތިބޭނެ ކަމަށެވެ. އެއީ ފަސް ޑޮކްޓަރުންނާއި ފަސް ނަރުހުންގެ އުތުރުން ފަސް ޓެކްނިކަލް މީހުންނެވެ.