އެއާ އެމްބިއުލާންސްގެ ހިދުމަތް އިއްޔެ ފެށުމާ އެކީ އޭގެ ފުރަތަމަ ދަތުރު ކުޅުދުއްފުއްޓަށް ރޭ ބާއްވައިފި އެވެ.
އެ ސިޓީން ބަލިމީހަކު މާލެ ގެންދަން ކުރި ދަތުރުގައި ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ފުރައިގެން އެއާ އެމްބިއުލާންސް ކުޅުދުއްފުއްޓަށް ލޭންޑްކުރީ ރޭ މެންދަމު 2:00 ޖަހާއެހާކަށް އިރު އެވެ. އަދި ބަލި މީހާ ގޮވައިގެން ފުރީ މެންދަމު 3:20 އެހާކަށްހާ އިރު އެވެ.
އެއާ އެމްބިއުލާންސްގެ ހިދުމަތް ދެނީ ގައުމީ އެއާލައިން މޯލްޑިވިއަންއާ ގުޅިގެންނެވެ. އެގޮތުން އެއާޕޯޓް ހިމެނޭ ސަރަހައްތަކަށް އެއާ އެމްބިއުލާންސްގެ ހިދުމަތް ދެނީ އެކަމަށް ހާއްސަކޮށްގެން ބަދަލުތަކެއް ގެނެސްފައިވާ ޑޭޝް-8 ގެ ބޯޓެއްގަ އެވެ. މިއީ އެއްފަހަރާ ދެ ބަލިމީހުން އުފުލޭނެ އެއްޗެކެވެ.
The inaugural Air Ambulance Medical evacuation flight departing from Male’, marking a significant milestone in emergency medical services.#AirAmbulance #Maldivian pic.twitter.com/EOvWrauoYw
— MaldivianAero (@MaldivianAero) March 1, 2024
އެއާ އެމްބިއުލާންސްގެ ހިދުމަތުގައި 15 މުވައްޒަފަކު ތިބޭނެ އެވެ. އެއީ ފަސް ޑޮކްޓަރުންނާއި ފަސް ނަރުހުންގެ އިތުރުން ފަސް އިމަޖެންސީ ޓެކްނީޝަނުންނެވެ.
އެއާ އެމްބިއުލާންސްގެ ހިދުމަތަށް ސީޕްލޭނެއް ވެސް ބޭނުން ކުރާނެ އެވެ. މި ހިދުމަތަކީ މޯލްޑިވިއަން އޮޕަރޭޓްކުރާ އައިލޭންޑް އޭވިއޭޝަން ސާވިސެސް (އައިއޭއެސް) އާއި ހެލްތު މިނިސްޓްރީ އާއި ޓްރާންސްޕޯޓް މިނިސްޓްރި އާއި އެންސްޕާގެ އިތުރުން އާސަންދަ ގުޅިގެން ދޭން ފެށި ހިދުމަތެކެވެ.