ކައުންސިލުތަކަށް އާމްދަނީ ހޯދޭނެ ގޮތްތައް ފަހިކޮށް ދިނުމުގެ ގޮތުން ފަޅުރަށްތައް ދޫކުރެވޭ މުއްދަތު އިތުރުކޮށް ދެއްވަން މަސައްކަތް ކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅިވެއްޖެ އެވެ.
އަތޮޅުތަކަށް އިއްޔެ ފެއްޓެވި ތިން ވަނަ ދަތުރުގެ ތެރެއުން ރޭ ރ. މީދޫ ރައްޔިތުންނާ އެކީ ބޭއްވި ބައްދަލުވުމުގައި ރައީސް ވަނީ ކައުންސިލްތަކަށް ފަޅުތައް ދޫކުރާ މުއްދަތު 10 އަހަރުން 25 އަހަރަށް އިތުރުކޮށް ދެއްވުމަށް މަސައްކަތްކޮށް ދެއްވާނެކަމުގެ ޔަގީންކަން ދެއްވައިފަ އެވެ.
"މިހާރު އޮންނާނީ ދަންނަވާފައި، ރައީސް އޮފީހުގެ ކަމާބެހޭ ލީގަލް ޓީމުން އެކަން ކުރިއަށް އެ ގެންދަނީ އެ ދިހަ އަހަރު އަޅުގަނޑުމެން 25 އަހަރަށް ބަދަލުކޮށް ދޭނަން،" ރައީސް ވިދާޅުވި އެވެ. "އޭރުން އެ ލިބޭ ފަޅުރަށް ބޭނުންކުރެވޭނެ ފުދޭވަރެއްގެ ބޮޑެތި އިންވެސްޓުމެންޓްތައް ކުރަން."
ރައީސް ވިދާޅުވީ ގާނޫނު އޮތް ގޮތުން ފަޅުރަށްތައް ދޫކުރާ މުއްދަތު އެއަށްވުރެ ވެސް އިތުރުކުރެވިދާނެ ކަމަށެވެ. އެގޮތުން 50 އަހަރަށް ވެސް ދުކުރޭވެ ގޮތް ހެދުމުގެ ފުރުސަތު އޮތް ކަމަށް ވިދާޅުވިއެވެ.
ސަރުކާރުން ވަނީ ކައުންސިލްތަކުގެ އިހްތިސާސުން ބޭރުގައި ހިމެނޭ ފަޅު ރަށްތައް ވެސް ރައްޔިތުންގެ ފައިދާއަށްޓަކައި ކައުންސިލްތަކަށް ދޫކުރެވޭ ގޮތަށް ގަވައިދަށް ބަދަލު ގެނެސްފަ އެވެ. އެ ގަވައިދުގެ ދަށުން އިދާރީ ދާއިރާއެއްގައި ހިމެނޭ ފަޅުރަށްރަށުގެ ތެރެއިން ރަށެއްގެ ނުވަތަ ސިޓީއެއްގެ އިހްތިސާސްގައި ނުހިމެނޭ ފަޅުރަށްރަށް ދޫކުރާނީ ހައުސިން މިނިސްޓްރީންނެވެ.